Monday, August 28, 2017

දිසාපාමොක් මතක පලමු කොටස - විනය පාලක කතා වස්තුව හා සියවස පුස්ථකාලය

ඉස්කොලේ හිටපු ගුරුවරු ගැන මතකය  ලියන්න ටික කාලෙක ඉදලා ඕනෑකම තිබුනත් ඒ ඕනෑකම දවසින් දවස මගහැරුණා කියමුකෝ. ඒ හින්ද නියපොතු ටිකත් උල් කරගෙන පූසා ලකලැහැස්ති වෙන්නේ ගුරුවරු කීපදෙනෙක් ගැන මතකය අවධි කරන්න. පූසා පොඩි පැටියා කාලේ ඉදලා උගන්නපු ගුරුවරුන් ඔක්කමලා ගැන සැරෙන් සැරේ ලියන්න ඕනෑ කියලා හිතුනත් ජම්බුතුමා ගැන විතරයි ලියාගන්න පුලුවන් වුනේ. ගුරුවරුත් කොටස් දෙකකට බෙදන්න පුලුවන් එපාම කරපු සහ මතකයේ රැදුනු ලෙස. අද මම කියන්නේ මගේ මතකයේ රැදුනු ගුරුවරු දෙන්නෙක් ගැන.

මම මේ කියන්න යන චරිතය ගම්පහ බණ්ඩාරණායක විදුහලේ ඉතාම ප්‍රසිද්ධ චරිතයක් එවකට ප්‍රධාන විනය පාලක තනතුර පතිරත්න මහතා සමග හවුලේ දැරුවේ මෙතුමා තමයි. ජාතික හැදුණුම්පතේ සටහන් වෙච්චි ඇත්ත නම ප්‍රේමරත්න වුනත් මෙතුම ඉස්කෝලේ ඇතුලේ ප්‍රසිද්ධ වෙලා හිටියේ කක්කුට්ටා නමින්. ඉස්කෝලේ කොතනක වලියක් ගියත් කොයි තරම් චන්ඩියෙක් වුනත් කක්කුට්ටා එනවෝ කියල කිවුව ගමන් ගස් ගල් පෙරලගෙන දුවන්නේ අහුවුනොත් විදින්නට වෙන සංග්‍රහයේ රස දන්න හින්දමයි.
අපේ ඉස්කෝලෙට ඇතුල් වෙන්න ප්‍රධාන මාර්ග දෙකයි තියෙන්නේ ප්‍රධාන පිවිසුම සහ ක්‍රීඩා පිටියෙන් ඇති පිවිසුම ලෙසින්. ප්‍රධාන පිවිසුමේ ශිෂ්‍ය නායකයින් සමග අනිවාර්යෙන්ම විනය මණ්ඩලය නියෝජනය කරමින්  මෙතුමා රැදී ඉන්නේ වැරැද්දක් කරලා එන වාසනාවන්තයෙක් එනකම්. කොණ්ඩ රැවුල් වවාගෙන නිල ඇදුම අනුමත ආකාරයෙන් නැතිව එන වැරදි කාරයෙක් කිසිම දවසක බේරිලා යන්නේ නෑ වගේම ඒ අයට වැරැද්දේ ප්‍රමාණය අනුව ක්ෂණික තෑගි වගේම සැනසිලි තෑගිත් මදිනොකියන්නම බෙදලා දෙන්නත් මෙතුමා පසුබට වෙන්නේ නෑ. 
මට ඔහුව ලගින් ඇසුරු කරන්නට ලැබුනේ උසස්පෙල පන්තිවලට ආවට පස්සේ. ගොඩක් අය හිතන්නේ වගේම මාත් ඇතුලුව හිතාගෙන හිටියේ ඔහු ඉතාමත් සැරපරුෂ අයෙකු ලෙසින් නමුත් ප්‍රේමරත්න සර් ඇවිදින ආර්ථික විද්‍යා දැනුම් ගබඩාවක් බව දන්නේ බොහෝම ටික දෙනෙක් විතරයි. බොහොමයක් වෙලාවට ඉතා දරදඬු පුද්ගලයෙක් විදියට පෙනුනට එතුමා තුළ ඉතා සුන්දර මනුස්සයෙක් ජීවත් වුණා. ඔහුගේ නිදහස් කාලපරිච්චේදයකදී අපි පන්තියට කතා කලත් ඒ හැමදාම ඇවිත් කුමක් හෝ නොදන්නා දෙයක් කියා දෙන්නට ඔහු කවදාවත් දෙපාරක් සිතුවේ නැහැ. 
ඒකට හොඳම උදාහරණයක් මම කියන්නම් මේ සිද්ධිය සිදුවුණේ X-Ban 2008 ප්‍රදර්ශනය පවත්වන්න ඉදිකිරීම් කරගෙන ගිය කාලවකවානුවේදී.
එ්කාලේ පාසලේ විනය නීති අනුව ජංගම දුරකථන පාසලට රැගෙන යන්න බැහැ. ඒත් අපේ නිර්මාණයට අදාළව අමුද්‍රව්‍ය හොයන්න යන්න වෙනත් කටයුතු වලට කණ්ඩායම් යද්දී ඒ කණ්ඩායම් අතර සම්බන්ධීකරණය පවත්වා ගන්න ඕන නිසාත් හදිසි පණිවිඩ දැනුම්දෙන්න පහසුව තකාත් මම මගේ ජංගම දුරකතනය හොරෙන් පාසලට අරගෙන ගියා ඒත් කවදාවත් ඒක මාට්ටු වුනේ නෑ. ඒත් එක දවසක් ඉදිකිරීම් කරගෙන යන අතරතුරදී මොකක් හරි දේකට ප්‍රේමරත්න සර් ඇවිල්ල මාත් එක්ක කතා කර කර හිටියා. සර්ත් එක්ක කතා කර කර ඉන්නකොට ටික වෙලාවකින් මගේ සාක්කුවේ උන්න ජංගමයා අඩන්න ගත්තා. මගේ දෙලොව රත්වුනේ අහුවුනා නම් ඇපත් නැති බඩුත් රාජසන්තක වෙන හයිකෝට් වැරැද්දක් හින්දා. ඒත් සර් එදා මට කිව්වේ කොල්ලෝ හොරෙන් අරගෙන ආවානම් ඕක හොරෙන්ම තියා ගනින් නැත්තම් විනය පාලකයා වුන මගේ පට්ටමේ තේරුම කියලා විතරමයි.


********

මම ඊලඟට කියන්න යන්නේ ඉස්කෝලෙ හිටපු තවත් වැදගත් චරිතයක් ගැන. අපේ ඉස්කෝලේ පුස්තකාල තුනක්  තිබුණා කනිෂ්ඨ පුස්තකාලය විද්‍යා අංශයේ පුස්තකාලය සහ සියවස සමරු පුස්තකාලය වශයෙන්. සියවස පුස්ථකාලය නමින් මේක හදුන්වන්නේ හිටපු කීර්තිමත් අධ්‍යාපන ඇමතිවරයෙකු වු ඊරියගොල්ල මහතාගේ සමයේදී පැවති සියවස අධ්‍යාපන ප්‍රදර්ශණය සිහිවීමට ඉදිකරන ලද්දක් නිසා. මම කියන සියවස පුස්තකාලයේ පුස්තකාලයාධිපතිනිය විදියට හිටියේ සුනේත්‍රා මහත්මිය. අනාදිමත් කාලෙක ඉඳලා ඇයගේ නම ප්‍රසිද්ධ වෙලා තිබුණේ කාලි අම්මා කියලා.
අප පාසලින් සමුගත් දා සුනේත්‍රා මහත්මිය සමගින් පුස්ථකාලයේදී

පුස්ථකා‍ලය පාලනය කරද්දී ඇය ඉතා දරදඬු නපුරු තැනැත්තියක් වුණත් ඉතා හොද මනුෂ්‍ය ගුණදම් හිතේ පැවති ගුරුවරියක් විදියට මගේ මතකයේ රැඳී තිබෙනවා. පුස්ථකාලේ ඇතුලේ කියවන දගලන කොල්ලන්ව කනෙන් අල්ලලා එලියට ඇදලා දාන්නත් ඇය දෙපාරක් හිතන්නේ නෑ.සියවස පුස්තකාලය කෙරවලේ අන්තිම මේසය හැමදාම අපිට වෙන්වෙලා තිබුනේ අපේ පුස්තකාලය උදේ ඉඳලා බදු අරගෙන හිටපු යාවජීව සාමාජිකයෝ හින්දා. පන්තියෙන් බෑග් තිබ්බ ගමන් දුවන් යන්නේ පුස්ථකාලෙට. සමහර වෙලාවට අපි කාටහරි පුස්ථකාලේ බලාගන්න කියලා දීලායන වෙලාවලුත් නොතිබුනා නෙවෙයි.
පුරා වසර දෙකක් අපිටම වෙන්කර තිබූ මේසය

උසස් පෙල විභාගය කිට්ටු වෙද්දී වරකට බැහැර දෙන්නේ එක පොතක් වුනත් අපි පොත් තුන හතර ගෙනාපු දවස් තිබුනා.ඇගේ මතකය කොතරම් හොඳයි ද කියනවා නම් ඇයට උදෑසන ඕනෑම මොහොතක ඕනෑම පොතක් නම කිවූ සැණින් එය තිබෙන ස්ථානය නිවැරදිව පැවසීමේ හැකියාව තිබුණා. කාලෙකට පස්සෙ මට මේ ගුරුවරු දෙන්න ගැනම මතක් වුනේ මේ ලගදී ප්‍රේමරත්න සර්ව ගම්පහ නගරයේදී කාලෙකට පස්සේ මුණගැහිලා කථාබස් කරපු හින්දා. මෑත කාලීන ඉතිහාසය තුල අප පාසලේ ස්වර්ණමය යුගය වෙච්ච හිටපු විදුහල්පති පූජ්‍ය ලබුතලේ සුදස්සන හිමියන්ගේ පාලන කාලයෙන් පස්සේ පත්වෙලා අාපු කාඩ්බෝඩ් විදුහල්පති චරිතය හින්දා  ස්ථාන මාරු ලබපු ගුරුවරුන් අතරේ මේ ගුරුවරු දෙන්නත් ඇතුලත් වුනා.

පසු සටහන

  • මේ වෙද්දී ප්‍රේමරත්න සර් තුඩැල්ල ක්‍රිස්තුරාජ විදුහලින් විශ්‍රාම ලබා ඇති අතර සුනේත්‍රා මහත්මිය සිය ගුරු දිවියේ අවසාන මාස කිහිපය උඩුගම්පොල විදුහලක සේවය කරමින් සිටියි.
  • අද වන විට සියවස පුස්ථකාලය එහි නැති අතර එය කඩාබිද දමා විද්‍යාගාරයක් ගොඩනගා ඇත.

ඒ වගත් මෙසේමැයි අදත් පහුරු ගෑ මම සුදුපූසා වම්හ....

Friday, July 28, 2017

කජුකැලය හරහා මතක කැම්පස් කටුබැද්ද සිව්වන දිගහැරුම -සුභා,ෆැෂන් ඩිසයින් සහ නික්මයාම

පළමු දිගහැරුම
දෙවන දිගහැරුම

තෙවන දිගහැරුම
ජාතියේ මහා පහන්ටැබේ රාජකාරී කල කාලය පිලිබදව තරම් යලිත් අතීතයට ගොස් ආවර්ජනය කිරීම තරම් සතුටක් ලේසියෙන් අත්වන්නේ නැතිතරම්ය. ඒ ගතකල කාලය ඉතාමත් සොදුරුය. මේ දවස්වල යලිත් මගේ මතකය කැරකෙමින් පවතින්නේ මොරටුව කටුබැද්දේය. තේරෙන භාෂාවකින් කියනවානම් මොරටුව විශ්වවිද්‍යාලය තුල ගත කල කාල සීමාවේ මතකයයි. ඉතිරි වී ඇත්තේ ඒ හා බැඳුණු මිහිරි හා අමිහිරි මතකයන් කිහිපයක් සිහිකිරීම පමණි. 

මගේ මතකයෙන් කිසිදිනක නොමැකෙන චරිතයක් වූවේ එකල ප්‍රධාන වෛද්‍යතුමියයි. ඇයගේ කියුම් කෙරුම් මීට පෙර ලිපියක සදහන් කලත් මෙයද නොකියාම බැරිය. එක්තරා දිනෙක මා යනවිට සරසවියේ සිසුවෙකු ඉතා වැදගත් ශරීරාංගයක් තුවාල වී ප්‍රතිකාර ගන්නට ඇවිල්ලාය. මානවකයා පවසන්නේ විනෝද චාරිකාව අතරතුර සියඇල්ල නැරබීමට යාමේදී පය ලිස්සා ගලක ඇතිල්ලීම නිසා මේ තුවාලය සිදුවු බවයි.

ඔහු සමග පැමිණි මිතුරන්ගෙන්ද විමසූ විට ඔහුන්ද සිසුවාගේ කියමන තහවුරු කල අතර ප්‍රධාන හෙද නිලධාරිවරයා බෙහෙත් දමමින් සිටියේය.
මේක නම් මේ ගලක ඇතිල්ලිලා වෙච්ච දෙයක් නම් නෙවෙයි මේකට වෙන හිස්ට්‍රියක් තියෙනවායැයි අපට පැවසූ දොස්තර නෝනා  යලිත් තුවාල ලද මානවකයාගෙන් ඇත්ත කියන්න යැයි පැවසූවිට ඔහු යලිත් පෙර හේතුවම පවසා සිටින්නට විය. 

එවිට මදක් කල්පනා කල වෙදදුරුතුමිය සියල්ලන්ටම ඇසෙන සේ ඇසුවේ "ඈ දරුවෝ ඔය කියන ගලට අත් දෙකකුයි කකුල් දෙකකුයිත් තිබුනාද පුතේ කියාලාය". එය ඇසූ සියල්ලන්ගේම මුවට සිනහව නැගුනු අතර මානවකයා පමණක් ලැජ්ජාවෙන් ඇබරෙන්නට විය.
*******
එකල කටුබැද්දේ රාජකාරී කල කාලයේ මමද මල් කඩමින් කාලය ගත කල සමයක් වූ අතර එයට උපරිම නිදහස පැවති ස්ථානයක් ලෙස මෙය මම නොබියව ප්‍රකාශ කරමි. මගේ මල්කැඩීමේ සහායිකාවද එකල අපොස උසස්පෙලට මුහුණදී විශ්වවිද්‍යාල වරම් බලාපොරොත්තුවෙන් පසුවූවාය. ඇයව සුභා ලෙසින් මම හදුන්වමි. එම වසරේ විශ්වවිද්‍යාල අත්පොත නිකුත් කල දිනම විශ්වවිද්‍යාල ප්‍රතිපාදන කොමිසමෙන් රැගෙන ආවේද පලමු වරට අන්තර්ජාලය මගින් අයදුම්පත යොමුකලේද මා විසිනි. 
දිවංගත අධ්‍යාපන අමාත්‍ය C.W.W කන්නංගර මැතිතුමාගේ සංකල්පයකට අනුව අරබන ලද පලමු මධ්‍ය විදුහල් පහෙන් එකක අධ්‍යාපනය හැදෑරු ඇය අධ්‍යාපන පහසුකම් අතින් දුෂ්කර යැයි විශ්වවිද්‍යාල ප්‍රතිපාදන කොමිෂම විසින් සදහන් කර ඇති වියලි කලාපයේ දිස්ත්‍රික්කයකට අයත් නිසා ඇයගේ ඉසෙඩ් අගය ප්‍රමානවත් වූ අතර එවර අධ්‍යන වර්ෂය සදහා අවම කඩයිම් ලකුණු නිකුත් කලදා නිසකවම ඇය වඩාත් කැමැත්තෙන් සිටි විලාසිතා නිර්මාණවේදය පාඨමාලාවටම සුදුසුකම් ලබා ඇති බව දැන්වූවාය. මා හොදින් දන්නා මිතුරියක් එම පාඨමාලාවේම තෙවන වසරේ සිටි නිසා ඇය සුභාට අවශ්‍ය උදව් කිරීමට පොරොන්දු වූවාය.

කාලය ගත වන විට මා හට රාජකාරීමට වශයෙන් හා අධ්‍යාපනික වශයෙන් නොසිතූ ගැටලු කිහිපයකට මුහුණදීමට සිදුවූ අතර තෙමසක් පමණ කටුබැද්දෙන් ඉවත්වී ප්‍රධාන කාර්යාලයේ සේවයට ගිය අතර තවත් මසක් අධ්‍යන කටයුතු සදහා සම්පූර්ණයෙන්ම නිවාඩු ලදිමි. ඒ අතරතුර එක්වරම ඇය වෙනස්වන්නට ගත්තේ සිතා ගැනීමටවත් නොහැකි ආකාරයෙනි. සමාජ ජාල වලින් මා අවහිර වන්නට වූ අතර කෙටි කලකින් දුරකතන අංක අවහිර වන්නටද විය. මා හට මෙය මහත් ප්‍රෙහේලිකාවක්වූ අතර කුමක් වූවාදැයි මම නොදනිමි. අදටත් ඇයට සිදුවූ දෙය පිලිබදව මම කල්පනා කරමි. ඇතිවූ කණස්සල්ල නිසා සතියක් පමණ නිවාඩු ගෙන නිවසට වී සිටියේ සිත්වේදනාව දැඩි වූ නිසාය. ඇය පිලිබදව මගේ දෙපාර්ථමේන්තු ප්‍රධානී ජේෂ්ඨ කලමණාකාර ජනක මහතා දැනසිටියේය ඒ දිනක් ඇයගේ ව්‍යාපෘතියකට අවශ්‍ය අමුද්‍රව්‍ය සෙවීමට ගොස් සිටියදී පිටකොටුවේ මයුරා විදීයේදී අප මුණගැසීම නිසාය.
සිදුවුයේ කුමක්දැයි දැන ගැනීමට මුණගැසී කතා කරන්නට කිහිප වතාවක්ම උත්සහාකලත් ඇය කිසිදු ප්‍රතිචාරයක් නොදැක්වූවාය. ඇයට මගේ නමට ලබාදී තිබූ සිම්පතද මම අවලංගු කර දැමුවේ ඇයගෙන් ප්‍රතිචාරයක් නොවූ තැනය. අවසානයේ මිතුරන්ගේ අවවාද උපදෙස් නිසා හිත හදාගත් මම තීරණයකට ආවෙමි.එනම් තව දුරටත් මොරටුව විශ්වවිද්‍යාල ශාඛාවේ හිතට එකගව කටයුතු කල නොහැකි නිසා යලිත් ස්ථාන මාරු අයදුම්කර කලින් සිටි දෙපාර්ථමේන්තුව වෙත යලි එන්නටය. මා වෙනුවෙන් ක්‍රිෂාන් කටුබැද්දට පැමිණි නිසා එක් සිකුරාදාවක සියලු මතකයන් රදවාගෙන කටුබැද්දෙන් නික්ම ආවෙමි. 
*******
මේ සිදුවීමෙන් අඩ වසරකට පමණ පසු අප්‍රේල් මස පැවැති අධ්‍යාපනික ප්‍රදර්ශනය නැරබීමට ගිය අතරතුරදී යලි වතායක් මම ඇයව දුටු නමුත් නොදුටුවාක් මෙන් මම එතැනින් නික්ම ආවෙමි.


කජුකැලේට පායුපු හඳ ලස්සනයිද කියන්න
හොස්ටල් එකේ සිට බැලුවත් තිබුනේ එයයි පෙනෙන්න
නොදැනිම අමතක වුනානේ නුඔට ඒගැන සිතන්න
මතකයේ රැදි රැවක් අද සිටියා මොරටුවෙදී දකින්න

වහිනා කල සරසවියට කුඩය යටින් යැවෙන්න
මගේ තනියට ආපු නුඔත් දැන් නැහැනේ පෙනෙන්න
ලතා මඞුළු අත වැනුවම සිතුනද අත් හරින්න
මරු වැල් වල පැටලුන විටදි සිතුනද හැරිලා දුවන්න


පාසල් බිම අතහැරලා ගෙන්දගමේ පය ගසන්න
එන විට නුඹ බැලුවේ හොඳම තැනට බැඳෙන්න
අන් අය ගැන නොතකාලා ජීවිත ගොඩ නගන්න
පලමුව නුඹට දිගු කල දෑතට කෙලියා නේද රිදෙන්න



උබේ මතකය ගුලි කරලා බොල්ගොඩ ගඟේ ගිලෙන්න

දැම්මත් එය පාවෙලා අද කටුබැද්දේ තිබුන දකින්න

මා ලඟ කිසිවක් යලි නැත උඹ වෙනුවෙන් පුදන්න
ඉඩ දෙනවද උඹට හොද ටොක්කක් අනින්න


කටුබැද්දේ මතකය ගැන කියාගෙන පැමිණි කතා පෙල අනුව තවත් කතා කිහිපයක්යම ඉදිරිපත් කල යුතු වුවත් සිතට එකගව තවදුරටත් කටුබැද්දේ මතකය අවදිකිරීම සිත්වේදනා ගෙන දෙන්නක් බැවින් මේ ලිපියත් සමග කජුකැලය හරහා කටුබැද්ද මතක කතාමාලාවට තාවකාලික විරාමයක් තබමි. පසුකලක ඉතිරිය ඉදිරිපත් කිරීමට අදහස් කරගෙන සිටිමි. 

පසු සටහන

  • මෙහි එන චරිත නාමයන් සෑම විටම කල්පිත චරිතනාමයන්ම වන අතර සිද්ධීන් පමණක් සත්‍ය වෙයි.
  • මා හට අවශ්‍ය අධ්‍යන නිවාඩු හා කෙටි නිවාඩු කිසිදු විමසීමකින් තොරවම අනුමත කරදුන්නාවූද අකාලයේ දෙවියන් වහන්සේ බැහැදැකීමට පිටත්වූ නැසීගිය ජේෂ්ඨ කලමණාකාර ජනක් මහතාවද ආදරයෙන් සිහිකරමි.


ඒ වගත් මෙසේමැයි අදත් පහුරු ගෑ මම සුදුපූසා වම්හ......


Friday, May 5, 2017

කඩු පන්තියේදී හමුවූ මනමේ වැදිරජු

අ.පො.ස උසස්පෙල අවසන් කර ජාතික ව්‍යාපාර කළමණාකරණ විද්‍යායතනයේ උසස් අධ්‍යාපනය ඇරබීමට පෙරවූ සංක්‍රාන්ති සමය දැහැමෙන් සෙමෙන් ගතකරන අතරතුර අපි කතාකරගත්තේ සැමට ඉදිරියේදී එකාවන්ව මුහුණදීමට සිදුවන රැජිණගේ බස පිලිබද ගැටලුවෙන් මිදෙන්නේ කෙසේද කියාය මක්නිසාදයත් විශේෂයෙන්ම රජයේ මෙන්ම පුද්ගලික විශ්වවිද්‍යාල වලද සියලු අධ්‍යන කටයුතු සිදුකරනු ලබන්නේ ඉංග්‍රීසි බසින් වන නිසා ඒ සදහා අප සතුව එවකට පැවති භාෂා හැකියාව කිසිලෙසකටවත් ප්‍ර‍මාණවත් නොවූනිසාය.
දින හතෙන් දින දාහතරෙන් මෙන්ම එක් මාසයකින් උගන්වන නානාප්‍ර‍කාර පංති හා කඳවුරු දිවයින පුරා අරබමින් සිටි වකවානුව වූ නිසාත් හොද පන්තියක් සොයමින් සිටි අපිට ඔත්තුවක් ලැබුනේ කොළඹ විශ්වවිද්‍යාලයේ මිතුරෙකුගෙනි. ස්ථානය නිවරදිව කියනවානම් කොළඹ විශ්වවිද්‍යාලීය ක්‍රීඩාපිටිය ඉදිරිපිට පිහිටා ඇති "Oxford Business Collage" නම් ආයතනයයි. 



අද මාතෘකාවට අදාල සොදුරු මිනිසා මට මුනගැසෙන්නේ එහිදීය.

ජයනාත් බණ්‌ඩාර නම්වූ ඔහු ඉතාමත් අපූරු ගුරුවරයෙකු විය. පාසල් සමය තුල අපහට ඉංග්‍රීසී භාෂාව වහ කදුරු බවට පත්වූයේ පාසල්වල විශය ඉගැන්වූ ගුරුවරුන් ඉගැන්වූ ඒකාකාරී රටාව නිසා බව අප සියලුදෙනාම විශ්වාස කරන්නාවූ කාරණාවකි. නමුත් නීරස හා අපහසු ඉංග්‍රීසි භාෂාවේ සිද්ධාන්ත හා ප්‍රායෝගික කොටස් ඔහු අපට ඉගැන්වූයේ භාෂාව පිලිබදව කිසිදු අප්‍රියතාවයක් අපතුල ඇතිවන්නට ඉඩක් නොතබමින්ය. තෙමසකට සැලසුම් කර තිබූ අප පාඨමාලාව තුල විසිදෙනෙකු පමණ සහබාගීවූ අතර නොවැලැක්විය හැකි කරුණුමත අමතර මාසයක් දක්වා දීර්ඝ කරන්නට සිදුවිය. මාසයක් පමණ ගතවන විට භාෂා දැනුම අප සැමගේ ඉහල ගියේ ඔහුගේ ඉගැන්වීමේ හැකියාවට පින්සිදු වන්නටය.

වීවේකී දිනක ගාලුමුවදොරදී


කටුබැද්ද ජයනාත් මහතාගේ නිවසේ

භාෂාවක් නිවරදිව ඉගෙන ගැනීමට කථනය,කියවීම,සවන්දීම හා ව්‍යාකරණ දැනුමද අවශ්‍යවන බවත් බොහෝ දෙනෙකු හට ඉංග්‍රීසි භාෂාව නොහැකි වන්නේ එය පාවිච්චියේදී වැරදීම් සිදුවේයැයි ඇති අනිසි බිය නිසා යැයි පැවසූ ඔහු ආයතනය තුලදී සිංහල බස භාවිතය තහනම් කරන ලදී. කොටින්ම කිවහොත් කැන්ටිමේ අංකල් බිස්නස් කලෙත් කඩු බසින් විමසුවොත් පමනි.

අවසාන දින ආයතනය ඉදිරිපිට


අද මාතෘකාව අදාල කථාව ඇරබෙන්නේ මෙතැන් සිටය. කොළඹ ආනන්ද විද්‍යාලයෙන් අධ්‍යාපනය ලද ජයනාත් බණ්‌ඩාර ලාංකීය නාට්‍ය වේදිකාව ජයගත් අපූර්ව රංගන ශිල්පියෙකි. 1989 වර්ෂයේ යෞවන සම්මාන උළෙලේ දී උඩරට නැටුම් ඒකල ප්‍රථම ස්‌ථානය දිනා ගනිමින් මෙන්ම විද්‍යාලයේ නාට්‍ය අංශයේ කැපී පෙනෙන චරිතයක්‌ වෙමින්ද ජයනාත් බණ්‌ඩාර රංගාවතරණය සිදු විය.
1989 දී  "මිහිදුම් සිහින", "හෙට කළුවර නෑ" ආදී නාට්‍යවල මෙන්ම 1993 සරසවි නාට්‍ය සම්මාන උළෙලේ හොඳම නළුවා වැනි සම්මාන දිනා ගනිමින් ඔහු තමන්ගේ රංගන ගමන් මඟ සනිටුහන් කළේය. 1999 රාජ්‍ය නාට්‍ය සම්මාන උළෙලේදී සම්මාන හතක්‌ දිනාගත් තුමිඳු දොඩන්තැන්නගේ "අරුන්දතී" නාට්‍යයේ මනෝරාජ්ගේ චරිතය සදහා හොඳම නළුවා සම්මානයත් දිනා ගැනීමට සමත්විය. 

වර්ෂ 1999 දී දක්ෂයන් අතරිනුත් අතිදක්ෂයන්ට පමණක් දොරටු විවර වන  අසහාය නාට්‍යවේදී මහාචාර්ය එදිරිවීර සරච්චන්ද්‍රයන්ගේ "මනමේ" නාටකයේ පීරිස් සමරවික්‍ර‍ම මහතාට පසුව වැදි රජුගේ චරිතයටත්,


ඉන් අනතුරුව වර්ෂ 2000 දී "සිංහබාහු" නාට්‍යයේ දීර්ඝ කාලයක් සිංහයාට පණපෙවූ ජය ශ්‍රී චන්ද්‍ර‍ජිත් මහතාගෙන් පසුව සිංහයාගේ චරිතයටත් රංගන දායකත්වය ලබාදීමට තොරාගැනීමෙන් අනතුරුව ඔහුගේ රංගන ජීවිතයේ ස්‌වර්ණමය යුගය උදාවිය.

 

ගල්ලෙන බිදලා ලෙන්දොර ඇරලා
සිංහබා! සිංහබා!! සිංහබා!!!

මා සොදුර! මා සොදුර !!මා සොදුර!!!

සිංහ සීවලී!  මා ප්‍රිය දියණිය
ගල්ලෙන බිදලා ලෙන්දොර ඇරලා
ගොසින් සැමදෙන නැතේ කිසිවෙක්
මම දැන ගතිමි- මම සැක කලෙමි
සිංහබා! සිංහබා!! සිංහබා!!
 

විටෙක තම බිරිඳත් දියණියත් අහිමිවීමේ කෝපයද දුකද මැනවින් නිරූපනය කරමින් සිංහබාහුහි සිංහයාගේ චරිතය නිරූපණය කරණ ඔහු විටෙක මනමේ වැදිරජු ලෙස දුෂ්ඨ චරිතයකට පණපොවයි. එසේත් නැතිනම් ඊට හාත්පසින්ම වෙනස් බක්මහ අකුණු හි මුදලිතුමාගේ චරිතයට ප්‍ර‍විෂ්ඨ වෙයි. එසේ විවිධ විවිධ ශෛලීන්ගෙන් යුතු චරිත නිරූපනයට ඔහු මනා හැකියාවකින් යුක්තය. 


මනමේ - වැදිරජූ / දිසාපාමොක් ඇදුරු
සිංහබාහු - සිංහයා
බක්මහ අකුණු - මුදලිතුමා
දික්තල කාලගෝල - දික්පිටියා
රාස්ස පරාස්ස - පොතේගුරු
නරිබෑනා - ගමරාල / කපුවා
අරුන්දතී - මනෝරාජ්


පුංචි තිරයේ දී ඔහු දි. ග. සෝමපාලගේ "නිල්ල පෙනෙන මානයේ" ප්‍රධාන චරිතයටත්, ලක්‍ෂ්මන් විජේසේකරගේ "දඟයන්ට පමණයි" ටෙලි නාටකයේ ප්‍රධාන චරිතයටත් රංගන දායකත්වය ලබාදුන් ඔහු ස්‌වභාවික නාට්‍ය සම්ප්‍රදාය විෂයෙහිද තම ප්‍රතිභාව ප්‍රකට කළේය. හඬ කැවීම් ශිල්පියෙකු ලෙසද ටෙලි නාට්‍ය හා කාටුන් සඳහා සිරස ටී.වී., හිරු ටී.වී. වැනි නාලිකා හරහා ජයනාත් බණ්‌ඩාර තම හඬ අවදි කළේය. එපමණක් නොව ටීවී ලංකා ආයතනයේ නිවේදකයකු ලෙසත් ජාතික රූපවාහිනියේ රංග භූමි අධ්‍යාපනික වැඩසටහනේ පිටපත් රචකයකු හා කථිකයකු වශයෙන් ඔහු තම ශිල්පීය ඥනය තුළින් ලාංකීය ප්‍රේක්‌ෂකයන්ට නවමු අත්දැකීමක්‌ එක්‌ කළේය.

මේ මස දෙවන සතියේ තම උපන්දිනයද සමරන ඔබහට තවතවත් දරුවන්ගේ නැණනුවන පෑදීමටත් චිරාත් කාලයක් සබේ රඟන්නටත් ශක්තිය ලැබේවා යන්න මගේ පැතුමයි...

 

 

ඒ වගත් මෙසේම අදත් පහුරු ගෑ මම සුදුපූසා වෙමි......

 


Saturday, April 29, 2017

සුභ ගමනක් වේවා තුමනි.....



වසර දෙකක බ්ලොග් කෙරුවාව ඇතුලතදී බ්ලොග් ලෝකයේදී හමුවු සොඳුරු මිනිසුන් අතරේ විචාරකතුමා මටත් බොහොම සුවිශේෂි පුද්ගලයෙක් බවට පත්වූනා. සැබෑ ජීවිතයේදී මට එතුමා මුණ ගැසුණේ සයිබර් සිහින උළෙලේදී අහඔුලෙසින්.


ශ්‍රී ලංකා යුධ හමුදාවේ අවිආයුධ පදක්කම් පලදනා හමුදා නීතිය මෙන්ම පැරණි මෙහෙයුම් පිලිබද සාමාන්‍ය ස්ථානයකින් ලබාගත නොහැකි තොරතුරු කියවන්නන්ගේ සිත්ගන්නා ලෙස ඉදිරිපත් කරන්නට ඔහු සතුවූ හැකියාව ඉතා ඉහලමට්ටමක පැවතිබව නොරහසක්.





දවසක් නොමියෙන මිනිසුන් චිත්‍රපටිය බලද්දී අහම්බෙන් විචාරක වගේ කෙනෙක්ව දැක්ක හින්දා මම ඒ ගැන විමසලා දාපු කොමන්ටුවට විචාරක දාපු කොමන්ටුව තමයි ඉහලින් තියෙන්නේ. පස්සේ චිත්‍රපටිය රූගත කරද්දී වෙච්ච දේවල් ටිකක් එක්ක මේල් එකක් එවලා තිබ්බා. වෙනම පෝස්ටුවක් ඒ ගැන ලියන්න පොරොන්දුවක් දුන්නත් එය ලියා පලකරන්නට පෙර ඔහු නික්ම ගිහින්.



ඉක්මනින්ම යන්න වෙන බව ඒතුමා කලින් දැනගෙන හිටියද කියලත් වෙලාවකට හිතෙනවා අන්තිම පෝස්ට් වලට දාපු කොමන්ට්ස් දැක්කම


යලි මතු උපදින්නාවූ ආත්මයන්හීදී ඔබට මෙවන් අකල් මරණයන්ට ගොදුරු නොවී අවසානයේ උතුම්වූ නිර්වාන සුවයම අත්වේවා යැයි මම ප්‍රාර්ථනා කරමි. එතෙක් ඔබ නින්දට පත්වන තුරාවට සියලු දේවතාවෝ ඔබ වෙනුවෙන් ගී ගයත්වා..
ඔබට සුවදායී රාත්‍රියක් වේවා තුමනි..........


අදත් මතකය  පහරා පහුරු ගෑ මම සුදුපූසා වෙමි............

Monday, April 10, 2017

දෙවසරක් පුරා ආ ගමන සොදුරුයි විශ්මයජනකයි

අදින් හරියටම මාස විසිහතරකට පෙර සුදුපූසා බවට පත් වු මම අද බ්ලොග් අවකාශයේ දෙවනි වසර සපුරාලන්නෙමි. අද දින හිමිදිරිය වන විට මෙයත් සමග පෝස්ටු හතලිස් පහකුත් සහ හිට් කවුන්ටරය පනස්දහසකට ආසන්න ලෙස දර්ශණය වෙනවා. වර්ශ 2012 පමණ සිට බ්ලොග් කියෙවුවත් ලියන්න නම් කාලයක් හා ඉස්පාසුවක් ලැබුනේ 2015 වසරේ මුල වගේ තමා.

අද මේ දෙවසරක් ගෙවෙන මේ වෙලාවේ මට බ්ලොග් ලියන්නට පෙලබවු හා උදව් කල කිහිපදෙනෙකුව මතක් කිරීම මගේ යුතුකමක් කියලා හිතනවා

  • කැන්ගරුලන්තයේ බටහිරට ආසන්න පර්ත් නගරයේ පදිංචිව සිටියාවූද සිරි ලංකා ගමනාගමන මණ්ඩලයේ කුරුණෑගල දකුණ සහ ගම්පහ ප්‍රාදේශීය වැඩපලවල් වල මාගේ පියා සමග සේවය කලාවූද ඔබ්සවර් නැත්තම් ඔබා මාමා ලෙසින් බ්ලොග් ලොව දැන හදුනාගත් සනත් විජේවර්ධනයන් 
  • පන්සලේ කතා වගේම බස් පලුවන්ගේ කතා වගේම විශාල කතා ප්‍ර‍මාණයක් බ්ලොග් අවකාශයට දායාද කලා වූවද අද වන විට බ්ලොග් ලිවීම යනු කුමක්දැයි නොදන්නා තත්වයට පත්වී ඇති මාරයාගේ හෝරාවේ මාරයා 
  • බ්ලොග් ලෝකෙට මුල් ගුරු වෙච්චිතමන් දැල්වු   පහණින්  තවත් පහන් සිය ගණනක් දැල්වූපුක යනු කුණුහරුපයක් නොවන බව ඔප්පු කලාවූත් රසික සූරියාරච්චි නොහොත් පැරණි කතන්දරකාරයා
  • මගේ බ්ලොග් එකේ පලමුවැනි පෝස්ටුව වෙච්චි දඩයමේ යාම  කතාවට හා හාපුරා කියලා නමෝවිත්තියෙන් පලවෙනි කමෙන්ටුව කෙටූ අවන්හලේ මහේශ් රත්නායක  
  • පූසාව සජීවි ලෙස මුණගැසී කතාබහ කල මගේම පාසලේ බ්ලොග්කරු  කාමරේ සිරා
  • මේ වන විට මද අසනීප තත්වයෙන් පෙලෙන අසමි දකිමි සොයමි විචාරක තුමා
  •  


එදා පළමු දොලොස්මස පසුකරපු මොහොතේ මම ඔබට කිව්වා මම කොහොමද බ්ලොග් ලිවීමට පෙළඹුනේ කියලා. මුලදි කරගන්න බැරුවයයි කියලා හිතුනත් දැන්නම් අබිං කෑවාවගේ තමයි. මොනවාහරි නොලියා ඉන්නම බෑ වගේම බ්ලොග් කියවන්නේ නැතුව ඉන්නත් බෑ කොච්චර වැඩ රාජකාරී ගොඩගැහිලා තිබ්බත්. බ්ලොග් ලියන කෙනෙකුගෙන් ඇහුවොත් ඇයි ලියන්නේ කියලා, නොයෙකුත් පිළිතුරු ලැබෙන්න පුළුවන්. අපි කාටවත් මේ සමාජයේ තනිවී ඉන්නට බැහැ. අපගේ සිතුවිලි හා චිත්තාවේගයන් සදහන් නොකර ඉන්නට බැහැ. සමහර විටකදී සිතෙහි පවතින ආවේගයන් හා කෝපයන් පිටකරන්නත් මගේ අතින් ලිපි ලියවෙන අවස්ථාවන් නැතුවාම නෙවෙයි. අනෙකුත් සෑම ලේඛන සහ ප්‍රකාශන මාධ්‍යවල යෙදෙන්නන් කරන්නේත් එයමයි. ඉතින් බ්ලොග් ලියන අපිත්, අනෙකුත් මුද්‍රිත සහ විද්‍යුත් මාධ්‍ය වලට වඩා පෞද්ගලිකත්වය විදහා දක්වමින්, චිත්තාවේග පිටකරමින් ලියන එකයි කරන්නේ කියලයි මමනම් හිතන්නේ.   

මෙවර නෙලුම්යාය බ්ලොග් සම්මාන උළෙලේ හොදම බ්ලොග් නවකතාව තුන්වන ස්ථානය මා ලියූ නිර්සත්වයෝ කතාමාලවට හිමිවීම  සතුටක් මෙන්ම තවතවත් ලියන්නට උත්තේජනයක්ම විය. නිර්සත්වයෝ කතාමාලාව මගේ පුද්ගලික ජීවිතයේදී ලද අත්දැකීමක් ඇසුරින් ලියන ලද්දකි. අපාය පමණක් කල්පිතයක් වූ අතර පේරාදෙණිය විශ්වවිද්‍යාලය මොරටුව විශ්වවිද්‍යාලය බවට ආදේශ කලහොත් අනෙකුත් සියලුම ප්‍ර‍ධාන චරිත මෙන්ම අතුරු චරිත වල නම්ගම් සත්‍ය වන අතර ඔහුන් පුද්ගලයින් ලෙස ජීවමානව අදටත් සුවසේ වෙසෙත්.  
මේ කතාව පිලිබද සත්‍ය කතාව දන්නේ ඒ පිලිබදව විමසා සිටි ඩ්‍රැකී සීනියර් පමණි.

ඉහත සදහන් කල පිරිසට අමතරව නිතරම ගොඩවදින අම්බලන්ගොඩයා , කුරුට්ටන් පිරිස , දිනේෂ් , කැලේ පිපුණු මල් , වැසි දැරිය , අටම්පහුර අටම්තුමා, බ්‍රා මෙන්ඩිස් සහ ප‍්‍ර‍සන්න වැනි අය මෙන්ම වරක් හෝ පැමිණි  නම් වශයෙන් සදහන් නොකල එකී නොකී සියලුම දෙනාටම හිස නමා ආචාර කරමි......

අවසාන වශයෙන් ලබන්නා වූ සිංහල හා හින්දු අලුත් අවුරුද්ද සෑම සියලු දෙනාටම සාමය සතුට සෞභාග්‍යයෙන් සපිරුණු සුභම සුභ අලුත් අවුරුද්දක්ම වේවා............



ඒ වගත් මෙසේම අදත් පහුරු ගෑ මම සුදුපූසා වෙමි.............


Monday, April 3, 2017

අපි නොදන්න චෙක්පත් - දෙවන කොටස

අපි නොදන්න චෙක්පත් පලමුවෙනි කොටසින් චෙක්පතක් කියන්නේ මොකක්ද කියලා වගේම චෙක්පතක මූලික කොටස් මොනවද කියලා මම සටහන් කලානේ. අද ලිපියෙන් චෙක්පත් රේඛණයන් ගැන හා වලංගු කාල සීමාවන් ගැන විස්තර කරන්න තමයි හදන්නේ.

සාමාන්‍ය විදිහට චෙක්පතක් ලිව්වා නම් ලිව්ව දිනයත් ඇතුලත්ව මාස හයක කාලයක් දක්වා වලංගු වන අතරම නීතිමය ක්‍රියාමාර්ග ගැනීමට චෙක්පත ලිවූ දින සිට වසර දෙකක කාලයක් ඇතුලත හැකියාව තිබෙනවා. චෙක්පතක් රේඛණය කරනවා කියන්නේ මොකක්ද? ගොඩක් අය චෙක්එක ලියලා වම්පැත්තේ උඩ කෙලවරේ සමාන්තර ඉරිකෑලි දෙකක් ගහනවා දැකලා ඇති. ඒ හැරුණම සාමාන්‍ය හා විශේෂ කියලා රේඛණය කොටස් දෙකකට බෙදන්න පුලුවන්. චෙක්පතකට රේඛණයක් යොදන්නේ ඒමගින් චෙක්පතේ ආරක්ෂාව වැඩිකර ගන්නයි

අපි බලමු චෙක්පත් සදහා රේඛණයන් යොදන ආකාරය

  • ආදායකයාගේ ගිණුමට පමණයි

ඉහත චෙක්පතේ තියෙන්නේ ආදායකයාගේ ගිණුමට පමණයි(Account Payee only) කියලා. මේක නම් හැමවෙලාවෙම වගේ බහුලව යෙදෙන රේඛණයක්. මේකෙන් කියවෙන්නේ මේ චෙක්පතේ වටිනාකම ලබා ගන්න පුලුවන් වෙන්නේ චෙක්පතේ ආදායකයා වශයෙන් නම සදහන් වෙන තැනැත්තාට පමණයි. ඒ වගේම මේක බැංකුවේ කවුන්ටරයෙන් මාරුකර ගන්න බෑ. අනිවාර්යෙන්ම ආදායකයාගේ නමට තියෙන ජංගම ගිණුමක තැන්පත් කරලා මාරුකරගත යුතුයි.

  • ගණුදෙණු කල නොහැක
චෙක්පත් වලින් තියෙන වටිනාම ප්‍රයෝජනයක් තමයි තමන්ට ලැබුන චෙක්පත තමන්ගේ ගණුදෙණුවක් පියවන්නට තවත් අයෙකුට පිටසන් කර ලබාදීමට හැකිවීම. මේක ව්‍යාපාරිකයින් අතර හරිම ජනප්‍රිය ක්‍ර‍මයක් වුනත් සමහරුන් කැමති නෑ තමන් දුන්න චෙක්පතක් අතින් අත යනවට ඒවගේ උදවිය යොදන රේඛණයක් තමයි ගණුදෙණූ කල නොහැක.
මේක යෙදුවහම ඒ චෙක්පත වලංගු වෙන්නේ් මුහුණතේ නම සටහන්ව පවතින ආදායකයාට තම ගණුදෙණුව පියවා ගැනීම සදහා පමණයි.

  • උපරිම මුදලට සීමා පැණවීම

සමහර අවස්ථාවන් වලදී මුදල් අගයක් සටහන් නොකර චෙක්පත් ලබාදීමේදී ආරක්ෂාව තකා උපරිම මුදලක් රේඛණයක් ලෙසින් යෙදිය හැකියි. උදාහරණයක් ලෙස ඉහත චෙක්පතේ රුපියල් 14000/- නොයික්මවිය යුතුයි යනුවෙන් රේඛණයක් යොදා තියෙනවා. ඒවිට චෙක්පත ලද තැනැත්තාට චෙක්පතේ අගය ලෙස සටහන්කර මුදල් ගත හැක්කේ රුපියල් දාහතර දහසක් හෝ ඊ්ට අඩු අගයක් පමණයි

  •  වලංගුවන කාලය සීමා කිරීම

සාමාන්‍යයෙන් චෙක්පතක් වලංගු කාලසීමාව මාස හයයි. නමුත් සමහර අවස්ථාවල දින සීමාවන් පණවමින් චෙක්පත් නිකුත් කරනවා. බොහෝවිට රාජ්‍ය ආයතන වලින් කරනු ලබන ගෙවීම මෙලෙස දින සීමාවට යටත්ව නිකුත් කරනවා. ඉහත උදාහරණයේ පරිදි දින 30 60 90 වශයෙන් සීමාවන් යෙදීමට හැකියාව තිබෙනවා. එලෙස සදහන් දින ගණන පසුවුවහොත් ඒ චෙක්පත අඟරු චෙක්පතක් බවට පත්වනවා

  • විශේෂ රේඛණයන්
ඉහත ජායාරූපයේ තියෙන්නේ විශේෂ රේඛණයන්ගෙන් එකක්. මේකේ තියෙන විදිහට මේ චෙක්පත අනිවාර්යෙන්ම ලංකා බැංකුවේ මැල්සිරිපුර ශාඛාවේ ආදායකයා නමින්ම ඇති ගිණුමක තැන්පත් කිරීමෙන් පමණක් මුදල් ලබාගැනීමට පුලුවන්. වෙනත් කිසිදු ආකාරයකට මුදල් ලබා ගත නොහැකියි. නැතහොත් චෙක්පත යලිත් අණකරුවෙත ලබාදී වෙනත් චෙක්පතක් ලබා ගැනීම හෝ යොදා ඇති රේඛණය අවලංගු කරගත යුතුයි.

රේඛණයන් අවලංගු කරවා ගැනීම

 සෑම චෙක්පතකම රේඛණයන් අවලංගු කරගත හැකි අවස්ථාවන් දෙකක් පවතිනවා 
  • චෙක්පත ලිවු තැනැත්තා හෝ අායතනය මගින්
ආදායකයාගේ ගිණුමට පමණයි යණුවෙන් සදහන් රේඛණය ඉවත් කර ගැනීමට නම් චෙක්පත ලිව්ව පුද්ගලයා විසින් රේඛණ්‍ය අවලංගුයි(Crossing cancel) යනුවෙන් ලියා යලිත් සිය ආදර්ශ අත්සන යෙදිය යුතුයි එවිට රේඛණය බලාත්මක වන්නේ නැහැ.
උපරිම දින සීමාවක් සදහන් චෙක්පත් වල කාලය දිගු කරවා ගැනීමට පුලුවන්. ඉහත පරිදිම චෙක්පත ලිව්ව පුද්ගලයා හෝ ආයතනය විසින් චෙක්පතේ උපරිම දිනය ඉක්මවා යෑමට පෙර දිනය දීර්ඝ කර අවශ්‍ය අත්සන් යලිත් වරක් චෙක්පතෙහි යෙදිය යුතුයි. 

ඉහත උදාහරණයේ චෙක්පත 12/11/2015 නිකුත්කලත් එය ලබාගත් තැනැත්තාට දින තිහක් තුල තැන්පත් කිරීමට නොහැකි වන නිසා යලිත් 12/12/2015 සිට තවත් දින 30 සදහා දීර්ඝ කරදී තිබෙනවා. නමුත් මතක තබා ගන්න මෙම දීර්ඝ කිරීම සිදුවිය යුත්තේ චෙක්පත් දිනය පසුවන්නට පෙරයි. 13/12/2015 මෙය දීර්ඝ කලා නම් චෙක්පත අඟරු වෙනවා


  •  තැන්පත් කල බැංකුව මගින්

ඔබ සිතන්නේ රේඛණයන් සිදුකරන්නේ ගණුදෙණුකරුවන් පමණක් කියලාද? නැහැ බැංකුව විසිනුත් චෙක්පත් වල රේඛණයන් සිදුකරනවා එය නිශ්කාෂණ මුද්‍රාව(Clearing Stamp) යනුවෙන් හදුන්වනු ලබනවා.

ඉහත චෙක්පතෙහි යොදා ඇත්තේ එම මුද්‍රාවයි. ස්කෑන් කරණු ලබන චෙක්පත් ප්‍ර‍තිම්භයන් ලංකා ක්ලියර් ආයතනයට යැවීමේදී ශාඛාවේ අනන්‍යතාවය තහවුරුකිරීම සදහා බැංකුවේ නමත් ශාඛාවේ නමත් සහ ශාඛාවේ අංකය සහිත මුද්‍රාවක් යොදනු ලැබේ. ඉන්පසුව එම චෙක්පත කිසිදු විටක වෙනත් බැංකුවකට යොමු කිරීමට නොහැකිය. සාමාන්‍යයෙන් අපි චෙක්පත් එකතු කරන්නේ එකම වේලාවකට නොවන අතර සෑමදිනකම පැයෙන් පැයට චෙක්පත් ලබාගෙන ඒසදහා නිශ්කාෂණ මුද්‍රාවන් යොදා නිශ්කාෂණ ක්‍රියාවලියට යොමුකරවනු ලැබේ. එම නිසා හදිසියේවත් තැන්පත් කල චෙක්පතක් යලි ගෙනයාමට ගණුදෙණුකරුවකුට අවශ්‍ය උවහොත් "සියලුම නිශ්කාෂණ මුද්‍රාවන් අවලංගුයි" (All Clearing crossings Cancel) යන මුද්‍රාව තබා එහි නිශ්කාෂණ කටයුතු භාර නිළධාරියා හෝ වෙනත් බළලත් අයෙකු විසින් තම අත්සන යොදා ලබාගත යුතුයි.

ඊලග කොටස් වලින් චෙක්පත් ලියද්දී බහුලව කරන අතපසුවීම්, චෙක්පත් අඟරු වෙන්න බලපාන හේතු, අඟරු චෙක්පත් නිවේදනය(CRN) වගේම සංචාරක චෙක්පත් ගැනත් පැහැදිලි කරන්නම්.



පසු සටහන

  • මම මෙහි විස්තර කලේ අවශ්‍යමයි කියලා හිතුන රේඛණයන් විතරයි.  නමුත් කියවන ඔයාලට චෙක්පත් සම්බන්දයෙන් දැනගන්න දෙයක් එහෙම තියෙනවානම් හරි නොපැහැදිලි තැනක් එහෙම තියෙනවානම් අහන්න

ඒ වගත් මෙසේමැයි අදත් පහුරු ගෑ මම සුදුපූසා වම්හ ........

Wednesday, March 15, 2017

අපි නොදන්න චෙක්පත් - පලමු කොටස

ජීවිතේ කවදහරි දවසක ඔයාලටත් මොකක්හරි දේකට චෙක්පතක් ලැබිලා ඇතිනේද? එහෙමත් නැත්නම් ඔබ චෙක්පත් මගින් ගෙවීමක් සිදුකරලා තියෙනවා වෙන්නත් පුලුවන්. ඔයාගේ නමට ලැබුණ චෙක්පත බැංකුවේ කවුන්ටරයට ගෙනිහින් මුදල් බවට පත්කරගෙන හෝ ගිණුමට තැන්පත්කරලා මුදල් අරගෙනත් ඇති නමුත් ඒ පිටිපස්සේ තියෙන විශාල ක්‍රියාවලිය ගැන ඔයාල ටිකක් හරි දැනගෙන සිටියාද? 
මම චෙක්පත් සම්බන්දව කාලයක් තිස්සේ කටයුතු කරන හින්දා අපේ ගණුදෙණූකරුවෝ කරන වැරදි ගොඩක් නිරීක්ෂණය කරලා තියෙනවා. දැනට මේ ඉන්න තැනට සාමාන්‍ය දවසක නම් චෙක්පත් 250-300 අතර ප්‍ර‍මානයක්ද වැටුප් හා වැටුප් අත්තිකාරම් ආසන්න දවස්වලට චෙක්පත් 850 ත් 1000ත් අතර ප්‍ර‍මානයක් දෛනිකව දැබෙනවා උනත් හැමදාමත් චෙක්පත් 70ත් 100ත් අතර ගණනක් අඟරු(Return) වෙනවා.ඒක හින්දා චෙක්පත්වල ඉතිහාසය වගේම නිතර කරන වැරදිත් මේ ලිපි පෙලෙන් කියන්න මම අදහස් කරනවා.
චෙක්පත් නිකුත් කරන්නේ ජංගම ගිණුම් සදහා පමණක් වන අතර එය පුද්ගලික ජංගම ගිණුම් සහ ව්‍යාපාරික ජංගම ගිණුම් ලෙස ප්‍ර‍ධාන වශයෙන් කොටස් දෙකකට බෙදා තිබෙනවා. ජංගම ගිණුම් ව්‍යාපාරිකයින්  සදහා ඉතා වැදගත් ගිණුම් වර්ගයකි. මුදල් මගින් ගනුදෙනු කරනු වෙනුවට චෙක්පත් මගින් ගනුදෙනු කිරිමට මෙම ගිණුම් තුල අවකාශ ලැබී ඇත. එමගින් තම මුදල් සදහා වැඩි ආරක්ෂාවක් හිමිවේ. ව්‍යාපාරික ජංගම ගිණුම් ඇරඹිමට ආයතනය ලියාපදිංචි කර ති‍බිම වදගත් අතර එවිට එහි නමින් ජංගම ගිණුම් පවත්වා ගෙන යා හැකිය. ජංගම ගිණුම් වල තැන්පතු සදහා බැංකුව විසින් කිසිදු පොලියක් නොගෙවන අතර බැංකුව විසින් ජංගම ගිණුම් සදහා පමණක් සපයන  අනෙකුත් සේවාවන් සදහා සේවා ගාස්තුවක් අය කෙරෙන අතර සමහර බැංකු ශේෂය යම් අවම ම්ට්ටමට වඩා අඩුවෙන් ඇති විටද සේවා ගාස්තුවක් අය කරයි. ප්‍රමාණවත් තරම් ශේෂයක් නොමැති විට නිකුත් කරන ලද චෙක්පත සදහා ගෙවීම් කිරිම බැංකුව ප්‍රතික්ෂේප කරන අතර එවැනි ‍අගර‍ැ වෙක්පත් සදහා ‍අගර‍ැ වෙක්පත් ගාස්තුවක්ද අයකෙරේ. බැංකුව විසින් සැම මාසයක් අවසානයේදි ගිණුම් හිමියා වෙත එම මාසය තුල සිදුවු ගනුදෙනු පිලිබදව විස්තරයක් නිකුත් කරනු ඇත. ලංකා බැංකුවේ ජංගම ගිණුම් ඇරඹීමට අදාල අවම අගයන් පහත පරිදි නියමකර තිබෙනවා


ශාඛා වර්ගය                     ව්‍යාපාරික ජංගම          ගිණුම්                              පුද්ගලික                                                  ජංගම ගිණුම් 

අධි ශ්‍රේණිය 15,000 10,000
‘A’ ශ්‍රේණිය 15,000 5,000
‘B’ ශ්‍රේණිය  10,000 5,000
‘C’ ශ්‍රේණිය 5,000 2,500

මීට අමතරව මූලස්ථාන ආයතනික ශාඛාවේ ඕනෑම ජංගම ගිණුමක අවම තැන්පතුව රුපියල් ලක්ෂයක් ලෙසද පුද්ගලික ශාඛාව මහනුවර අධිශ්‍රේණි හා පිටකොටුව ශඛාවන් සදහා අවම තැන්පතුව රුපියල් විසිපන්දහසක් ලෙසද නියමකර තිබෙනවා (මේ අවම තැන්පතු අගයන් ලංකා බැංකුවේ ජංගම ගිණුම් සදහා පමණයි) 

මේ ලෝකේ හා හාපුරා කියලා චෙක්පත් පාවිච්චිය ආරම්බ කරලා තියෙන්නේ 1659 තරම් ඈත කාලයේ එංගලන්තයේ Bank of England කියන ආයතනයකින්. ඒක අද කාලේ වගේ ලස්සනය මුද්‍ර‍ණය කරපු විධිමත් ආකාරයේ චෙක්පතක් නෙවෙයි.අද පවතින ආකාරයට සමාන වෙන්න මුද්‍ර‍ණය කරපු චෙක්පත් භාවිතය ආරම්බ වෙලා තියෙන්නේ 1717 දී එංගලන්තයේ ලන්ඩන් නුවරදී. 
ලොව පලමු චෙක්පත

මේ චෙක්පත් වල නිශ්කාෂණ(Clearing) කටයුතු කෙරෙන්නේ කොහොමද කියල දන්නවද? මේ ක්‍රියාවලිය අපිට පුලුවන් කොටස් තුනකට බෙදන්න
  1. එකම බැංකුවක එකම ශාඛාවක් අතර ගණුදෙණු වෙන චෙක්පත්
  2. එකම බැංකුවක විවිධ ශාඛාවන් අතර සිදුවන චෙක්පත් ගණුදෙණු
  3. බැංකු ආයතන දෙකක් අතර සිදුවන චෙක්පත් ගණුදෙණු
අංක එක යටතේ සිදුවෙන ගණුදෙණුවක් නම් උදාහරණ ලෙස ලංකා බැංකුවේ මහරගම ශාඛාවේ ගිණුම් හිමියෙකුට ඒ ශාඛාවේම චෙක්පතක් ලැබුනොත් ආදාල කාරණා සම්පූර්ණ වෙනවානම්(ගිණුමේ මුදල් පැවතීම,ආදර්ශ අත්සන් නිවරදි වීම ආදී) ඒ මොහොතේදීම චෙක්පත මුදල් කරගැනීමට හෝ ගිණුමට තැන්පත් කර ගන්නට පුලුවන්.

අංක දෙක යටතට එන ගණුදෙණුවක් නම් උදාහරණ ලෙස ලංකා බැංකුවේ හාලිඇල ශාඛාවේ චෙක්පතක් ලංකා බැංකුවේම මරදාන ශාඛාවේ ගිණුමකට දැම්මොත් ඒක එදා දවසේ වැඩ ඉවරවෙන්න කලින්(තැන්පත් කල මොහොතේ සිට 4.30 අතර) නිශ්කාශණ කටයුතු සිද්ධවෙනවා.

අංක තුන යටතට එන ගණුදෙණුවක් නම් උදාහරණ විදිහට ලංකා බැංකුවේ ගිණුම් හිමියෙකුට සම්පත් බැංකුවේ චෙක්පතක් ලැබුනොත් ඒක නිශ්කාශණය වෙන්නේ ඊලගට වැඩකරන දවසේ දවල් 2.30 පස්සේ (සිකුරාදා දවසක තැන්පත්  කලානම් සදුදා දවල් 2.30 පස්සේ තමා)

ඉස්සර නම් මේ ලංකාවේ සතරදිගන්තෙම චෙක්පත් දිනපතාම කුරියර් සර්විස් මගින් කොළඹට ගෙන්න ගත්තා. විශේෂයෙන් යුද්ධය පැවති මුල්සමයේ යාපනය වගේ දුරපලාත් වල චෙක්පත් නිශ්කාශණය වෙන්න ගොඩක් කල්ගතවුනා මොකද ඒ චෙක්පත් සියල්ලම සජීවීව කොළඹටම ලැබිය යුතුනිසා. අද වෙනකොට මේ නිශ්කාශණ කටයුතු වලට වෙනම ආයතනයක් පිහිටුවා තිබෙනවා සීමාසහිත ලංකා ක්ලියර් (Lanka Clear) සමාගම ලෙසින්. එය ලංකා බැංකු මූලස්ථානයේ 23 වන මහලේ පිහිටා තිබෙනවා.
නිශ්කාශණ ක්‍රියාවලිය
අද වෙනකොට ලංකාවේ සෑම බැංකුවක්ම ලංකා ක්ලියර් වෙත තම චෙක්පත් යොමුකරන්නේ ස්කෑන් කරනලද ප්‍රතිම්භයන් ලෙසයි. ලංකා ක්ලියර් වසරකට ආසන්න වශයෙන් මිලියන පනහක චෙක්පත් නිශ්කාෂණ කටයුතු සිදු කරනවා. දෛනික පියවීම් කටයුතු අවසානයේ අඟරු චෙක්පත් නිවේදනත්(Cheque Return Notice - CRN)  ඔහුන් විසින්ම නිකුත් කරනු ලබනවා.
අපි බලමු චෙක්පතක මූලික කොටස්
  1. චෙක්පතේ දිනය (වි‍ශේෂයෙන් සදහනක් නොවේනම් දාතමේ සිට මාස හයකට වලංගුය) 
  2. බැංකුවේ නම සහ ශාඛාවේ නම
  3. හෝ රැගෙන එන්නාට යන විධානය
  4. ආදායකයාගේ නම
  5. චෙක්පතේ වටිනාකම ඉලක්කමෙන්  
  6. චෙක්පතේ වටිනාකම අකුරෙන්
  7. අණකරුගේ අත්සන
  8. චෙක්පත් අංකය
  9. චෙක්පත අයිති බැංකුවේ සංඛේත අංකය
  10. චෙක්පත අයිති බැංකු ශාඛාවේ සංඛේත අංකය
  11. චෙක්පත හිමියාගේ ජංගම ගිණුම් අංකය
  12. විද්යුත් කියවුම් දත්ත සහිත තීරුව
චෙක්පත් රේඛන වර්ග අඟරු වීමට බලපාන හේතු වගේම නිතර කරන වැරදිත් වගේම සංචාරක චෙක්පත් ගැනත් ඊලග කොටස් වලින් ලියන්නම්.
මේ සම්බන්දයෙන් කියවන ඔයාලට ගැටලු වගේම දැනගන්න දෙයක් එහෙම ති‍යෙනවනම් අහන්න.

පසු සටහන
  • මම දැකපු අඩුම අගයකට රිටන් උන චෙක්එකේ අගය ශත විස්සයි.
  • තමන්ගේ අත්සන තමන්ටම මතක නැතුව එන ගණුදෙණුකාර මහත්වරුත් නැතුවම නෙවෙයි..

ඒ වගත් මෙසේම අද චැක්පොත් පහුරු ගෑ මම සුදුපූසා වම්හ......

Wednesday, March 1, 2017

මල්සරාගේ කතාවස්තුව

දඩාස් ගාල මොකද්ද වැටෙනවා වගේ සද්දයක් ඇහිලා නිදාගෙන හිටපු මාව උඩගිහින් බිම වැටුණා. වෙලාව පාන්දර දෙකත් පහුවෙලා යකෝ මේ මහ රෑ ගේ ඇතුලෙන් සද්දයක් ඇහෙන්නේ ගෙට හොරෙක් පැන්නවත්ද? කෑගහන්නත් හදලා කෝකටත් බලන එක හොදයිනේ කියලා ඇදෙන් බැහැලා ඇවිල්ලා වටපිට බැලුවාග බලපුවම කාමරේ ජනේලෙ වහලා නැතුව හුලගට බිත්තියේ වදිනවා ඒක දැක්කම තමයි ඇගට ලේ ටිකක් ඉනුවේ. එතකොටමයි මතකෙට ආවේ මම ජනේලේ ලොක් කරලනේ නිදාගන්න ගියේ එහෙවු ජනේලේ කොහොමද ඇරුණේ.. ඕන දෙයක් වෙච්චාවේ කියලා ගිහින් ජනේලය වැහුවා. මේන්න බොලේ එතකොටම කවුදෝ එකෙක් මගේපිටිපස්සෙ ඉන්නව ඉන්නවා වගේ. හැරිලා බැලුවම කලුවට කලුවේ අඟුරු කැටයක් වගේ එකෙක් විරිත්තගෙන ඉන්නවා
තමුසේ කවුද ? ගොත ගගහා මම ඇහවා. මේන්න මේකා අඩන්න ගත්තේ නැතැයි පොඩි එකෙක් වගේ මම ආයෙත් ඇහුවා නෝ රිප්ලයි. කෝකටත් කියලා ගිහින් දැම්මා ලයිට් එක. ඒ දැක්ක දේට මාව උඩගියා

ඇමරිකාවේ ඔබාමා ඇදලා අයින් කරපු ඉරිච්ච ඩෙනිමකුයි ලංකාවේ රැප් කාරයෙක්ගෙන් ගත්තු ටීශර්ට් එකකුයි ඇදගෙන මදිවට රොකට් ලොන්චරයක් පිටේ එල්ලගෙන. පපුව පුරා අත්බෝම්බයි පතුරම්වැලුයි පුදුම වෙපන් ගොඩක් ෂුවර් එකටම බින්ලාඩන් ගේ හරි අයිඑස් කාරයන්ගේ ගෝලයෙක්ද මන්දා මුට මගෙ ගෙදර පුපුරවලා මොනවද හම්බවෙන්නේ

තමුසේ කවුද ඕයි මම ආයේ ඇහුවා

ඔන්න ඕකනේ අයිසේ තමුසෙලට දැන් සිංහල සිරිත් විරිතුත් අමතකයි. ඉස්සරනම් කියන්නේ ලංකාවේ ඉන්න උන් හොදට ආගන්තුක සත්කාර දන්නවා කියලා ඒත් තමුසේ මට ඉදගන්න කිව්වේවත් නෑනේ  මම මෙච්චර දුර ඉදලා ඇවිල්ලත් 

යකෝ මූ ලේසි පහසු එකෙක් නම් නෙවෙයි වගේ. ඉතින් ඕයි මේ යක්කු ගස්යන වෙලාවට මටත් හොරෙන් මගේ කාමරේට පැන්න තමුසේ වගේ හොරෙකුට වාඩි වෙන්න කියන්න මට පිස්සු කියලා හිතුවද? තමුසේ පිරිභාහරන්ගේ ගෝලයෙක්ද? නැත්තම් අයිඑස් කාරයෙක්ද?

පිස්සුද ඕයි මම තමයි අනංගයා
මාව උඩගියා මූ කොහොමද මල්සරා වෙන්නේ ඒත් කමක් නෑ අත ලගටම ආපු වෙලාවේ මේකට කියලා වැඩක් කරගන්න  පුලුවන්නේ කියලා හිතලා මම කිව්වා සොරි සොරි ආයෙ මොකද හිටගෙනඉන්නේ සුදුසු තැනක් බලලා ඉදගන්න කියලා මමත් අනිත් පුටුව ඇදගෙන වාඩිවුනා. අපි අහලා තිබුණ විදිහටනම් මල්සරා අරගෙන යන්නේ දුන්නයි මල් ඊතලයි නේද? අනික මේ ඇදුම මම හිමීට හිතේ තිබුණ සැක ඇරගන්න ප්‍ර‍ශ්ණ පත්තරේ දිග ඇරියා.

අයියෝ ඒකවත් දන්නේ නැද්ද? මේක විසිඑක්වෙනි සියවසනේ තාක්ෂණ යුගය එහෙව් එකේ දැන් දුණු ඊතල වලින් තියලා වැඩක් නැහැ නවීන තාක්ෂණය යොදා ගන්න ඕනේ. 

දැන් මොකද එකපාරටම ලංකාවට ආවේ?

අපේ ගෑනි ෂොපින් යන්න එන්නේ ලංකාවටනේ මල්ලී. පෙරේදා යනවා කියලා ගියා ගියාමයි ආවේ නෑනේ. ඒකයි මේ හොයන්න කියලා ආවේ.

ඇයි දෙයියනේ එහෙ දිව්‍ය සලුපිලි වගේම ලස්සන ලස්සන මල් ජාති එහෙම තියෙනවලු නේද?

පිස්සු කතාකරනවා ලංකාවේ කට්ටියක් මෙහෙට ආවනේ. ආව ගමන්ම උන් තිබුන ගස්ටික කපන්න පටන්ගත්තා අන්තිමේදී එකම ගහක්වත් නැතිවෙලා ගියා. දැන් ඒක හින්දා ඇමරිකාවෙන් ජපානෙන් ප්ලාස්ටික් ගසුයි මලුයි ගෙන්නලා තියෙන්නේ. ඒක නෙවෙයි මම අහන්නම හිටියේ මොකද මේ සායවල් කොට වෙන්න වෙන්න ගණං වැඩි?

මෙහෙමනේ ඕවට ගණං දාන්නේ රෙදිවල ප්‍ර‍මානෙට නෙවෙයිනේ, ඒක ඇන්දහම පේන ශරීර ප්‍ර‍මානය  අනුවනේග අනික මෙහෙ තියෙන විදුලිබිලයි වැඩකරන අන්ගේ පඩියි ඔක්කොම එකතු කරලා තමයි බිල දාන්නේ.
ඇත්තටම මම අහන්නමයි උන්නේ අපේ ලංකාවේ මගෝඩිස්තුමාලා පිංකරලද එහෙට යන්නේ?

ඒක ඇහුවා විතරයි මෙන්න මේකා හිනාවෙන්න තියාගත්තා. ඇත්තටම තමුසේ ලංකාවේ නෙවෙයිද ජීවත්වුනේ. මගෝඩිස්ලා පිං කරපු අය නෙවේ. යම රජ්ජුරුවන්ටයි අපේ ලොක්කටයි පගාව දීලා දිව්‍යලෝකෙට පැනගෙන දැන් එන හැමඑකාම පගාවක් දීලා හරි පස්සේ ගෙවීමේ ක්‍ර‍මයට හරි දිව්‍යලෝකෙට රිංග ගන්නවා. එහෙම ආපු උන් වෙන තැනකට යන්නත් කැමති නෑ දැන් යම ලෝකෙනුත් කෑල්ලක් බද්දට ගන්න හදන්නේ ඉඩ නැති හින්දම. ඒත් ප්‍ර‍ශ්නෙ වෙලා තියෙන්නේ යමයෝ ස්ට්‍ර‍යික් කරනවලු අපායට සෙනග එන්නේ නෑ කියලා.

අනංගයා ගෙදරටම ආව වෙලාවේ ට්‍රයි කරන ගෑණු ලමයා සෙට් කරගන්න හිතලා මම මිනිහට කිව්වා අනේ මේ මට පොඩි උදව්වක් කරන්නකෝ කියලා 

මල්ලි මම මගේ ගෑණි හොයාගන්න බැරුව ඉන්නවා ඔයා මෙහේ මඟුලක් කතා කරන්න කියනවා. හ්ම් කමක්නෑ කියනවා බලන්න ලමයාගේ නම එහෙම නැත්තම් මට පෙන්නනවකෝ ඒ ලමයව

මං අහගෙන අද උදේ ඒ ලමයා මොන්ටානා එකේ පංති එනවා කියලා, 200 බස් ස්ටෑන්ඩ් එකට ගියා නම් හරියටම පෙන්නන්න තිබුණා

හ්ම් ඒකත් එහෙමද? එහෙනම් එනවා යන්න

පිස්සුද මෙහෙම යන්න පුලුවන්ද? මම දත් මැදලා තියා මුණ හොදලවත් නෑ අනික ශොටක් දාගෙන මෙහෙම යන්න පුලුවන්ද

බය වෙන්න එපා ඕයි අපිව කවුරුත් දකින්නේ නෑ කියලා මිනිහා අර එල්ලගෙන හිටපු ග්‍රෙනේඩ්  එකක් අරගෙන පින් එක ඇදලා බිමට ගැහුවා. ඒ එක්කම ලොකු සද්දෙකුයි දුමකුයි පිටවුනා. මම ඇස් දෙක ඇරලා බලද්දී මෙන්න අපි කොළඹ බස් ස්ටෑන්ට් එක ඉස්සරහා


කොහොමහරි විනාඩියක්වත් ගියේ නෑ දූවිලි අවුස්සගෙන කොළඹ පැත්තේ ඉදලා ආව බස් එකක් සද්දෙට බ්‍රේක් ගහලා හොල්ට් එක ලග නතරකලා. එකෙන් බැස්ස ගෑණු කෙනෙක්ව දැක්ක ගමන් මල්සරා ගොයියා කෑ ගහපි මේ මගේ හාමිනේ කියලා.
ඒත් එක්කම හැන්ඩි කොල්ලෙකුගේ අතින් අල්ලගෙන මල්කුමාරි පබ්ලික් හෝල් එක පැත්තට යනවා බලන් හිටපු අනංග ගොයියා හාට් ඇටෑක් හැදිලා දිව්‍යලෝකෙටම චුතඋනා.
(එතනින් එහාට උනේ මොකක්ද කියලා බලාගන්න බැරිඋනා මොකද මාව නින්දෙන් ඇහැරුන හින්දා. මොකද මම දැක්කේ හීනයක් අනේ)



ඒ වගත් මෙසේමැයි අද නින්දෙන් ඇහැරී පහුරු ගෑ මම සුදුපූසා වම්හ.......

Friday, February 10, 2017

අනාගතයෙන් ගෙනා ගැසට්පත්‍ර‍ය


රාජ්‍ය සේවා කොමිෂන් සභාව
ගේ දොර කටයුතු පිලිබද දෙපාර්ථමේන්තුව
අති විශේෂ (හොල්මන්) ගැසට්පත්‍ර‍ය

පෙම්වතිය III ශ්‍රේණිය තනතුර (මධ්‍ය විධායක සේවක ගණය) විවෘත පදනමට බදවා ගැනීම - 2017(2018)

නරලොව හොල්මන් අමාත්‍යංශයට අනුබද්ධිත ගේ දොර කටයුතු දෙපාර්ථමේන්තුවට පෙම්වතිය III ශ්‍රේණිය තනතුරට විවෘත පදනමට බදවා ගැනීමට සුදුසුකම් ඇති ශ්‍රී ලාංකික තරුණියන්ගෙන් අයදුම්පත් කැදවනු ලැබේ. තම අත්අකුරින් අයදුම්පත සම්පූර්ණ කල යුතු අතර එය 01/04/2017 ට පෙර ලියාපදිංචි තැපෑලෙන් එවිය යුතු අතර එය බහා එවන කවරයේ වම් කෙරවලේ "හොල්මන්කරුවන්ගේ පෙම්වතිය III ශ්‍රේණිය තනතුර" ලෙස සටහන් කල යුතුය.

(01)සේවා කොන්දේසි

මෙම පත්වීම (තමාගේ මනාපයෙන් හෝ අනුන්ගේ බලපෑමන් මත වෙන් නොවන්නේනම්) ස්ථීර වන අතර විශ්‍රාම වැටුප් සහිතය.තෝරාගන්නා ලද අයදුම්කාරිය පලමුව අනියම් පෙම්වතියක් ලෙස තුන් වසරක ආධුනික කාලයකට යටත්විය යුතුය. වින්නඹු හා අනත්දරු අරමුදලට දායක මුදල් ගෙවිය යුතුය. තෝරාගනු ලැබූ අපේක්ෂිකාව නරලොව හොල්මන්කරුවන් හදිසියේ කරන්නාවූ මහා රාත්‍රියේ තබ්ලා සර්පිනා වයලින් වාදනය, පූල් ගැසීම, ඕමි ගැසීම ආදී පුද්ගලික වැඩ කටයුතු වලට ඇඟිලි නොගැසිය යුතුයි.

සාවද්‍ය තොරතුරු ඉදිරිපත් කිරීම නොකල යුතු අතර එසේ කර ඇතිබව පත්වීම් ප්‍ර‍දානයෙන් පසුව හෙලිවුවහොත් අපකීර්තිමත් ලෙස සේවයෙන් පහකරනු ලැබේ.

(02) වැටුප් ක්‍ර‍මය
  • ආධුනික කාලය තුල දෛනික දීමනාවක් පමණක් ගෙවනු ලබන අතර සේවා ස්ථීර කරනු ලැබුවහොත් සියලුම දීමනා ඇතුලත්ව අපගේ සම්පූර්ණ වැටුපම අපට හොරෙන් අතගා ගැනීමට ඉඩ දෙනු ලැබේ.
  • පත්වීම ස්ථීර කරන තුරු පෙබරවාරි දාහතරට හිමි වැලන්ටයින් දීමනාව සහ උපන්දින උත්සව දීමනාවන් කිසිවක් ගෙවනු නොලැබේ.

  • සීට්ටු දීමනාව, අරුමෝසම් භාණ්ඩ දීමනාව, විලාසිතා දීමනාව, ඇදුම් ආයිත්තම් හා පලදනා දීමනාව, ද්වේශ සහගත පහරදීමේ දීමනාව සහ සියලු ගමන් වියදම් දීමනා ගෙවනු ලැබේ. ගෙවල් කුලී දීමනාව නොගෙවන අතර සේවා ස්ථීර වුවහොත් නිවාස පහසුකම් සපයනු ලැබේ.


(03) අධ්‍යාපන සුදුසුකම්

ශ්‍රී ලංකාවේ පිලිගත් විශ්වවිද්‍යාලයකින් හෝ ශ්‍රී ලංකා විශ්වවිද්‍යාල ප්‍ර‍තිපාදන කොමිෂන් සභාව පිලිගන්නා ආයතනයකින් ඕනෑම විශය මාධ්‍යයකින් ලබාගෙන ඇති ගෞරව හෝ සාමාන්‍ය (පන්ති සාමාර්ථ සහිතව හෝ රහිතව) පලමු උපාධිය හෝ උපාධි අපේක්ෂිකාවක් වීම.
සැලකිය යුතුයි - මොරටුව විශ්ව විද්‍යාලයේ විලාසිතා නිර්මාණය සහ නිපැයුම් ප්‍ර‍වර්ධනය දැනට හදාරමින් සිටින කිහිවෙකු හට මෙම තනතුරට අයදුම්කිරීමට නොහැකිවන සේ මෙම ලයිස්තුවෙන් අසාදු ලේඛණගත කර ඇත.

හෝ

ශ්‍රී ලංකා උසස් තාක්ෂණ ආයතනය මගින් ලබාදෙන උසස් ජාතික ගණකාධිකරණ ඩිප්ලෝමාව හෝ උසස් ජාතික ඉංජිනේරු ඩිප්ලෝමාව ලබා සිටීම හෝ මේ වනවිටත් හදාරමින් සිටීම  

හෝ

ජාතික ව්‍යාපාර කළමණාකරණ ආයතනය වරලත් ගණකාධිකරුවන්ගේ ආයතනය ශ්‍රී ලංකා බැංකු කරුවන්ගේ ආයතනය ශ්‍රී ලංකා තොරතුරු තාක්ෂණ ආයතනය හෝ ලංකාවේ පිලිගත් ආයතනයකින් වසරක කුමක් හෝ පාඨමාලාවක් හදාරා  තිබීම හෝ මේ වනවිටත් හදාරමින් සිටීම

හෝ

අ.පො.ස උසස්පෙල පස්වතාවකට නොඅඩු වාරගණනකදී පොදු පරීක්ෂණය හැර අවම විශයන් දෙකකින් සමත්වීම

සහ

මල්වතුවල රවුම් ගැසීම, පාලු දුම්රිය මැදිරි තුල ගමන් කිරීම, පුස්ථකාලයට යන බව දන්වා චිත්‍රපටි බලන්නට යාම, පෝය රජයේ නිවාඩු දිනවල අමතර පන්ති ඇතැයි පවසා ගෙදරින් පිටවීමට ඇති හැකියාව, විශ්ව විද්‍යාලයක හෝ උසස් තාක්ෂණ ආයතනයක නේවාසිකාගාරයක නේවාසිකව සිට ඇතිවීම හා මිතුරන් සමග හෝ නිවසේ සිටින විට දහයට ගණින්නට බැරි ලෙස සිටීය හැතිවිය යුතුය.

(04) වෙනත් සුදුසුකම්

මීට පෙර පෙම්වතියක් ලෙස අවම වසරක පලපුරුද්දක් ලබා තිබීම අමතර සුදුසුකමක් සේ සලකනු ලැබේ (අත්‍යාවශ්‍ය නැත)

සෑම ඉල්ලුම්කාරියක්ම 21/03/2017 දිනට වයස අවුරුදු 26 ක් හෝ ඊට අඩුවිය යුතු අතර අවුරුදු දහඅටට වඩා වැඩිවිය යුතුය

කුඩය යටින් ජෝඩුදමා ගමන් බිමන් යාමට ඇති හැකියාවද අමතර සුදුසුකමක් ලෙස සලකණු ලැබේ.

(05) සේවා කොන්දේසි

  • තෝරා ගන්නා තනතුරුලාභිනියන් සදහා පත්වීම් ලද දින සිට වසරක් ඇතුලත පළමුවන කාර්යක්ෂමතා කඩයිම පවත්වනු ලැබේ. එයින් සමත්වීම අත්‍යාවශය වන අතර කාර්යක්ෂමතා කඩයිම අසමත්වන්නන්ගේ පත්වීම අසමත්වූ මොහොතේ සිට බලපැවෙත්වන පරිදි අවලංගු කරනු ලැබේ.

  • මෙම පත්වීම වූ කලී මුදල් රෙගුලාසි, ආයතනික සංග්‍ර‍හය, පවුල් සංවිධාන සංග්‍ර‍හ රෙගුලාසි, උපත්පාලන රෙගුලාසි, මුලුතැන්ගෙයි සේවා කොමිෂන් සභා රෙගුලාසි හා අප විසින් කාලීනව විටින් විට පනවනු ලබන අමතර රෙගුලාසි වලට යටත් විය යුතුය.


  • රාජ්‍ය පරිපාලණ චක්‍රලේඛන 01/2014 අනුව සේවයට බැදී වසර තුනක් ඇතුලත සේවයට බැදුනු භාෂාව හැර අනෙක් රාජ්‍ය භාෂාවන් වන ප්‍රේම වචන හා සම්මත සිංහල පිලිබදව ප්‍ර‍වීනතාවය ලබාගත යුතුය.

  • පත්කරනු ලබන නිළධාරිනියන් 2017 අංක 999 දරණ ගේ දොර පිලිබද කොමිෂන් සභා පණතේ විධිවිදාන අනුව ප්‍රේම වචනයෙන් සෑම විටම කතාකීමට බැදීසිටියි. ප්‍රකෝප කරනු ලැබූ පසු පරිභව කිරීම සදහා සත්වනාම හෝ පිරිසිදු සම්මත සිංහල භාෂාව යොදා ගැනීම සම්පූර්ණයෙන්ම තහනම්ය. (මෙම නීතිය කඩකරීම නිසා නිදහසට කරුණු දැක්වීමට හෝ වැඩ තහනමකට ලක්වීමට සිදුවිය හැකිය)

  • තෝරාගන්නා අයවලුන් කෙටි දැනුම්දීමකින් දිවයිනේ ඕනෑම පලාතක ඕනෑම කාලගුණ තත්වයක් යටතේ ඕනෑම වේලාවක සේවය කිරීමට හැද පැලදගෙන සූදානම්වී සිටිය යුතුය.

 (06) බදවා ගන්නා ක්‍ර‍මය හා අනෙකුත් කොන්දේසි

  • පලමුව සාමාන්‍ය දැනීම සහ බුද්ධි මට්ටම මැන බැලීමට පවත්වන සාමාන්‍ය සම්මුඛ පරීක්ෂණයකින්ද පසුව වෛද්‍ය පරීක්ෂණයක්ද පවත්වා ඒ දෙකෙහිම ප්‍ර‍තිඵල මත බදවා ගැනීම් සිදුකරනු ලැබේ.

  • එම සියලුම දෙනා මාලබේ නෙවිල් ප්‍ර‍නාන්දු ශික්ෂණ රෝහලේ වෛද්‍යවරුන් ඇතුලු පිරිස පවත්වනු ලබන පූර්ණ වෛද්‍ය පරීක්ෂණයෙන් සමත්විය යුතුය.(ඇතිවිය හැකි භයානක ප්‍ර‍ථිඵල වලට වගකියනු නොලැබේ)

  • පලමුවන කාර්යක්ෂමතා කඩඉම පැවැත්වීමෙන් පසුව මුදුමාරු කර ආධුනික කාලයෙන් පසුව කච්චේරියේදී හදිසි මරණ පරීක්ෂක තැන ඉදිරියේදී ලියාපදිංචිකර ස්ථිර සේවයට බදවා ගනු ලැබේ.

(07) අත්සන සහතික කිරීම

අයදුම්කාරියගේ අත්සන පහත සදහන් අයෙකු විසින් සහතික කර තිබිය යුතුය.

දිවයිනේ ලියාපදිංචි අපරාධකරුවන්ගේ ලයිස්තුවෙහි නම සදහන් වන අයි.ආර්.සී  නාමධාරියෙකු / කසිප්පු මුදලාලි කෙනෙකු / හදිසි මරණ පරීක්ෂකවරයෙකු / පලාතේ වයින් ස්ටෝරුවේ අධිපති කෙනෙකු / මල්ශාලාවක එම්බාම් කරුවෙකු / පලාතේ (හොර)පොල් කඩන්නෙකු / පලාතේ තැපැල්කරු / පික්පොකට් කරුවෙකු / නගරසභා කුණුලොරියේ රියදුරුතැන විසින් තම ඇඟිලි අත්සන තබා සහතික කර තිබිය යුතුය. ඉහත ලයිස්තුවෙහි අයෙකු සොයාගත නොහැකි විටකදී පමණක් පාසලක විදුහල්පතිවරයෙකු / පූජ්‍ය පක්ෂයේ සැලකිය යුතු තනතුරක් දරන්නෙකු හෝ කොට්ඨාශයේ ග්‍රාම නිලධාරියා විසින් මුද්‍රාවතබා සහතික කල යුතුයි.

සෑම අයදුම් පතක් සමගම පහත සහතිකපත්වල පිටපත් එවිය යුතුයි.
(සෑම පිටපතක්ම සත්‍යබවට අයි.ආර්.සී නාමධාරියෙකු නම් තම 
 අයි.ආර්.සී අංකය පැහැදිලිවම සදහන් කරද සාමවිනිසුරෙකු නම් තම මුද්‍ර‍ාව මගින්ද සහතික කර එවිය යුතු වන්නේය)

  • උප්පැන්න සහතිකය (පාසලට ඉදිරිපත් කල සහතිකය හෝ නංගිගේ සහතිකය හෝ බාරගනු නොලැබේ)
  • මෑතකදී ගන්නා ලද ජායාරූපයක්(පරිඝණකය මගින් වෙනස් කරන ලද්දක් නම් දෙදෙනාම එක්අයෙකු බවට සහතික කරන ලද දිව්රුම් ප්‍ර‍කාශය)
  • කේන්දර කොපිය (මෑතකදී ලියවන ලද හොර කේන්දරයක් නම් දුම්මැස්සේ දමා නියමිත පරිදි පරණ කර තිබිය යුතුයි)
  • ගල් බොරැල්ලේ බානි රේමන්ඩ් මහතා හෝ ජයරත්න මහතා හා පුත්‍ර‍යා විසින් නිකුත් කරන ලද සුජීවත්බව තහවුරු කරන සහතිකය.
  • මෑතකදී ලබාගත් චරිත සහතික තුනක් (මෙයින් දෙකක් මීට පෙර පෙම්කල පෙම්වතකුගෙන් හා පාසලේ/විශ්වවිද්‍යාලයේ/උසස් තාක්ෂණ ආයතණයේ අදාල විනයභාර නිලධාරියාගෙන් විය යුතුය) 
  • මෙතෙක් ලබා ඇති ලස්සනම පෙම්හසුන හෝ කෙටි පණිවිඩය (ඇත්නම්)

(08) වෙනත් කරුණු

පළමු වරට ඉදිරිපත් වන අයදුම්කරුවන් තම අයදුම්පත් තමා විසින්ම හෝ දෙමාපියන් මාර්ගයෙන්ද, අනෙකුත් අයදුම්කාරියන් තම අයදුම්පත පැරණි පෙම්වතා මගින්ද එවිය යුතුයි.වත්මන් පෙම්වතුන් සිටින අයදුම්කාරියන් වෙතොත් කරුමෙකට හෝ තෝරා ගනු ලැබුවහොත් දික්කසාද නීති සංග්‍ර‍හය යටතේ අනුප්‍රාප්තිකයෙකු රහිතව මුදාහැරීමට හැකිබවට පෙම්වතා විසින් කල සහතිකය අමුණා එවිය යුතුයි.

ආධුනික කාලය තුල යම්හේතුවක් නිසා තනතුර අත්හරින්නේනම් එතෙක් ඒ වෙනුවෙන් දරණු ලැබූ වියදම් යලි ගෙවන බවට පොරොන්දුවී සේවය අරබන මොහොතේදී හොල්මන්කරුවන් සමග ගිවිසුමකට එලබිය යුතුයි.
(පලමුවන කාර්යක්ෂමතා කඩයිම අසමත්වී සේවය අවසන් කලහොත් මේ රෙගුලාසිය වලංගු නොවේ)



*මෙම තනතුරු සදහා මඟුල් කපුවන් මගින් අයතා බලපෑම් සිදුකිරීම අයදුම්කාරීය වහාම නුසුදුස්සෙකු වීමට හේතුවේ***




මීට අණපරිදි සුදුපූසා වන මම,
ගේ දොර කටයුතු පිලිබද දෙපාර්ථමේන්තුවෙහි,
ඉතිරිවී සිටින අවිවාහක හොල්මන් නිලධාරීන් පිරිස වෙනුවෙන්,
2017 වූ නවම් මස 10 වන දින 19:10 පැයට,
සාගරය මැද අමුතු රටේ, බස්නාහිර පලාතේ,
සියනෑ කෝරලයේ, දකුණු අලුත්කූරු පත්තුවේ පිහිටි,

බිළාල මුද්‍ර‍ණාලයේ යතුරුපුවරුවෙන් අච්චුගස්සවා ප්‍ර‍සිද්ධ කරන ලදී.


********
ඒ වඟත් මෙසේම අදත් වෙනදා මෙන්ම පහුරුගෑ මම සුදුපූසා වෙමි...