හයවෙනි සැතපුම සහ අතීතාවර්ජනය

 අදට අවුරුදු හයකට කලින් සුදුපූසා ලෙස ඉතා කුඩා පියවරක් තබමින් සයිබර් අවකාශයට පැමිණි මම කෙමෙන් කෙමෙන් විවිධ මාතෘකාවන්ගෙන් යුතු කතා පියවරයන් පනස්පහක් අතැතිව සුදුපූසාගේ අඩවියේ හයවෙනි සැතපුම් කණුව අද දින පසුකරන්නෙමි.

අද මේ හයවෙනි වසර ගෙවෙන මේ වෙලාවේ මට බ්ලොග් ලියන්නට පෙලබවු හා උදව් කල කිහිපදෙනෙකුව මතක් කිරීම මගේ යුතුකමක් කියලා හිතනවා

• මගේ බ්ලොග් එකේ පලමුවැනි පෝස්ටුව වෙච්චි දඩයමේ යාම  කතාවට හා හාපුරා කියලා නමෝවිත්තියෙන් පලවෙනි කමෙන්ටුව කෙටූ අවන්හලේ මහේශ් රත්නායක.
• පන්සලේ කතා වගේම බස් පලුවන්ගේ කතා වගේම විශාල කතා ප්‍ර‍මාණයක් බ්ලොග් අවකාශයට දායාද කලා වූවද අද වන විට බ්ලොග් ලිවීම යනු කුමක්දැයි නොදන්නා තත්වයට පත්වී ඇති මාරයාගේ හෝරාවේ මාරයා 
• බ්ලොග් ලෝකෙට මුල් ගුරු වෙච්චි, තමන් දැල්වු   පහණින්  තවත්පහන් සිය ගණනක් දැල්වූ, පුක යනු කුණුහරුපයක් නොවන බව ඔප්පු කලාවූත් රසික සූරියාරච්චි නොහොත් පැරණි කතන්දරකාරයා  
• ෂර්වුඩයෙ රොබින් වගේ කෙහෙල්කොටුවට පැනල කෙසෙල් ගස් පෙති පෙති කපාපු, හුරතලේට ඌරු පැටියෙක් හදාපු, කෙහෙල් කොටුවේ චූටි මහත්තයා නොහොත් බුද්ධී ප්‍රසාද් 
• පූසාව සජීවි ලෙස මුණගැසී කතාබහ කල මගේම පාසලේ බ්ලොග්කරු  කාමරේ සිරා 

බ්ලොග් අඩවිය පටන් ගත්තු කාලයේදී නම් මාසයකට ඒක පෝස්ටුවක් හෝ අකුරු කලත් ආරම්බක සමයේ ලියන්නට තිබුන ආශාව නැතිවෙලා ගියාද කියලක් වෙලාවකට හිතෙන තරමටම දැන් පූසා කම්මැලි වෙලා. දෙදහස් දහනවය හා දෙදහස් විස්ස අවුරුදු දෙකටම මගේ අතින් ලියවුනේ එකම එක ලිපියක් විතරයි. ලියන්න දේවල් ගොඩක් හිතේ තිබුනත් දැන් ඒවා අකුරු කරන්න පූසා කම්මැලියි. කොහොම උනත් ආයෙත් පරණ විදිහටම ලියන්න උත්සහා කරනවා. කොහොම වුනත් අතීතයේදී ආසාවෙන් කියවපු බ්ලොග් අඩවි අද දවස වෙන කොට යාවත්කාලීන නොවීමත් ඒවා අකුරු කල සොඳුරු නිර්මාණකරුවන්ට බ්ලොග් යනු කුමක්දැයි අමතකවී තිබීමත් කණගාටුවට කරුණක්.

එදා පළමු අවුරුද්ද පසුකරපු මොහොතේ මම ඔබට කිව්වා මම කොහොමද බ්ලොග් ලිවීමට පෙළඹුනේ කියලා. මුලදි කරගන්න බැරිවෙයි කියලා හිතුනත් දැන්නම් අබිං කෑවාවගේ තමයි. මොනවාහරි නොලියා ඉන්නම බෑ වගේම බ්ලොග් කියවන්නේ නැතුව ඉන්නත් බෑ කොච්චර වැඩ රාජකාරී ගොඩගැහිලා තිබ්බත්. බ්ලොග් ලියන කෙනෙකුගෙන් ඇහුවොත් ඇයි ලියන්නේ කියලා, නොයෙකුත් පිළිතුරු ලැබෙන්නට පුළුවන්. අපි කාටවත් මේ සමාජයේ තනිවී ඉන්නට බැහැ. අපගේ සිතුවිලි හා චිත්තාවේගයන් සදහන් නොකර ඉන්නට බැහැ. සමහර විටකදී සිතෙහි පවතින ආවේගයන් හා කෝපයන් පිටකරන්නත් මගේ අතින් ලිපි ලියවෙච්ච අවස්ථාවන් නැතුවාම නෙවෙයි නිර්සත්වයෝ කතාමාලාව ඒකට හොඳම උදාහරණයක්, අපාය අමතක කලොත් ඉතිරි සෙසු චරිත සියල්ලක්ම අදටත් සූජීවත්ව සිටින අය. අනෙකුත් සෑම ලේඛන සහ ප්‍රකාශන මාධ්‍යවල යෙදෙන්නන් කරන්නේත් එයමයි. ඉතින් බ්ලොග් ලියන අපිත්, අනෙකුත් මුද්‍රිත සහ විද්‍යුත් මාධ්‍ය වලට වඩා පෞද්ගලිකත්වය විදහා දක්වමින්, ආවේගයන් පිටකරමින් ලියන එකයි කරන්නේ කියලයි මම නම් හිතන්නේ.  

සුදුපූසාගේ අඩවිය ඇරඹීමට මුල් වූ හේතු ඇතුලත් කජුකැලෙය හරහා කටුබැද්ද කථාමාලාවට මුල්වූ ප්‍රධාන චරිතය මේ වසරේ දුරුතු මාසයේ උපාධි ලෝගුව කරලා ගෙන කටුබැද්දෙන් නික්ම ගියාය. නිර්සත්වයෝ  බදුවූ කතා කිහිපයකුත් මත්තට ඉදිරිපත් කිරීමට සූදානමින් සිටිමි.

ඉහත සදහන් කල පිරිසට අමතරව සුදුපූසාගේ අඩවිය අරබා ගෙවුනු වසර හය පුරාවට නිතරම ගොඩවදින අම්බලන්ගොඩයා ,කුරුට්ටන් පිරිස , දිනේෂ් , කැලේ පිපුණු මල් , වැසි දැරිය , අටම්පහුර අටම්තුමා, බ්‍රා මෙන්ඩිස් සහ ප‍්‍ර‍සන්න වැනි අය මෙන්ම වරක් හෝ පැමිණි කොමෙන්ටු යෙදූ නම් වශයෙන් සදහන් නොකල එකී මෙකී නොකී සෑම සියලුම දෙනාටම හිස නමා ආචාර කරමි..... 

 

ඒ වඟත් මෙසේම අදත් පහුරු ගෑ මම සුුදුපූසා වෙමි...................... 

පුංචි පැංච්යකගේ ඉරණම වෙනස් කරමු

අද කියන්නට යන්නේ මෙතෙක් මා අතින් නොලියවුනු අන්දමේ සටහනකි. බෞද්ධ දර්ශණය පිලිබදව පැහැදී ඒ පිලිබදව හැදෑරීමට නිරන්තරයෙන් ලංකාවට පැමිණෙන දැනට ස්කෝට්ලන්තයේ වාසය කරන රොකෝ මහතාට අප රටේ දුෂ්කර ප්‍රදේශයක අධ්‍යාපනයට දක්ෂ නමුත් ආර්ථික අපහසුතා ඇති දරුවෙකුට පොත් පත් වැනි අධ්‍යාපනික ද්‍රව්‍ය වලින් උපකාර කිරීමට අවශ්‍යතාවයක් ඇතිවිය. පසුව අනුරාධපුර ප්‍රදේශයේ විදුහල්පතිවරයෙකුට අපගේ අවශ්‍යතාවය පැවසූ පසු ඔහු විසින් සොයාබලා නිර්දේශ කරන ලද තැනැත්තිය වූයේ අද මෙහි කථානායිකාව වන ඕෂදී දියණියයි. අනුරාධපුර දිස්ත්‍රික්කයේ දුෂ්කර ගම්මානයක් වන කරුක්කන්කුලම ගමෙහි පදිංචිව සිටින ඕෂදී දියණිය දැනට ඉගෙනුම ලබන්නේ 8 වන ශ්‍රේණියේය. පසුගිය දිනක රොකෝ මහතා සමඟ මමද සාමාජිකත්වය දරණ ආරණ්‍ය.lk හි සාමාජිකයන් අනුරාධපුරය බලා පිටත්ව ගියේ ඇයට අවශ්‍ය අධ්‍යාපනික ද්‍රව්‍ය පරිත්‍යාග කිරීම සදහාය.‍

පරිත්‍යාග කිරීමට සූදානම් කල ද්‍රව්‍ය සමඟ රොකෝ මහතා

ඕෂදී දියණිය අධ්‍යාපනය හදාරන්නේ කොතරම් දුෂ්කරතා මධ්‍යයේද යන්න අපට අවබෝධ වූයේ ඇයගේ නිවස දුටුවිටදීමය. ඇයගේ පවුලේ පියා නොමැති අතර මව සහ වියපත් මිත්තණිය සමග ඇය වාසය කරයි. මිත්තණිය අන්ධ භාවයෙන් පෙලෙයි. මව ජීවිකාව ලෙස දැනට කුලී රැකියාවක නිරතවෙන නමුත් ඇය නිරන්තර ඇඳුම රෝගයෙන් පිඩා විදින්නීය. මෙම දියණිය දැනට ජීවත්ව සිටින්නේ මැටියෙන් නිමවන ලද අඩි 10 x 10 ප්‍රමාණයේ එක් කාමරයක් සහ කුඩා සාලයක් පමණක් ඇති ඉතා අබලන් තත්වයේ පවතින කුඩා නිවසකයි. ඇයගේ මුලු නිවසටම  ගෘහ භාණ්ඩ ලෙස කිබුනේ කුඩා පාඩම් මේසයක් සහ ප්ලාස්ටික් පුටු තුනක් පමණක් වන අතර නිවසේ සකස්කරන ලද කුස්සියක් නොමැතිවූ අතර නිවස පිටුපස එළිමහනට විවෘතව සකස්කල ලිපක්ද අබලන්වූ පිඟන් රදවනයක වූ පිඟන් තුනක් සහ වීදුරු තුනක් හැර වෙනත් කිසිදු දෙයක් එහි නොවීය. අප සාමාජිකයන් ඇගේ නිවසට ගිය දිනයේ පෙරදින ඇතිවූ වර්ෂාවට කුස්සිය තෙමීම නිසා ඹවුන් එදින ආහාර පිස තිබුනේද නැත.

නිවසේ ඉදිරිපස පෙනුම

 දැඩි ආර්ථික අපහසුතා සහ නොයෙක් දුෂ්කරතා මැද වුවද ඇය පසුගිය වාර විභාග සියල්ලේදීම සියලුම විෂයන් සදහා 75% වැඩියෙන් ලකුණු ලබාගෙන ඇත. ඇයගේ ඉගෙන ගැනීමට ඇති දැඩි උනන්දුව සහ කැපවීම මෙන්ම නිවසේ ඇති අපහසුතාවයන් දැක සංවේදී වූ රොකෝ මහතා ඇයට මාසිකව රුපියල් 5,000/- ක මුදලක් බැගින් වසරක කාලයක් අධ්‍යාපන කටයුතු වෙනුවෙන් ලබා දීමට කටයුතු කර ඇත.

කුස්සිය සහිත නිවසේ පිටුපස කොටස

ඉහත ජායාරූපයේ ඇත්තේ ඇයගේ අබලන් නිවසෙහි පිටුපස කොටසයි. Aranya.lk සාමාජිකයින් විසින් ඇයට නව නිවසක් ඉදිකර දීමට තීරණය කර ඇත. ඒ සදහා වන වියදම රුපියල් 600,000/- ලෙස ඇස්තමේන්තු ගත කර ඇත. ඉදිකිරීමට යෝජිත නව නිවස අඩි 21 x 18 ප්‍රමානයෙන් කාමර දෙකක් සහ සාලයක් ලෙස ඉදිකිරීමට සැලසුම් කර ඇත.

යෝජිත නිවසේ ත්‍රිමාණ පෙනුම

 

යෝජිත නිවසේ සැලසුම

ඇය දැනට පදිංචිව සිටින ඉඩමේ අයිතිය සහ නීතිමය භාවය මේ වන විට සොයා බලා තහවුරු කරගෙන ඇති අතර ඉදි කරන නව නිවසේ වහලය සදහා සම්පූර්ණ වියදම දැරීමට මේ වන විට අයෙකු ඉදිරිපත් වී ඇත. මල් කැකුළකට ඉබේ පරවී යන්නට ඉඩ නොතබමු. ඔබටද මටද ලැබූ ආකාරයටම ඇයටත් අධ්‍යාපනයෙන් ජයගන්නට මෙන්ම හිසට වහලක්  සාදා දෙන්නටත් දායකවන්නට ඔබත් කැමැත්තක් දක්වන්නේ නම් ඔබටයි මේ ඇරයුම. ඔබත් මුදලින්, ශ්‍රමයෙන් හෝ වෙනත් කිසියම් ආකාරයකින් දායක වීමට කැමැත්තක් දක්වන්නේ නම් හෝ වැඩිදුර තොරතුරු දැනගැනීමට අවශ්‍යවන්නේ නම් පහත සබැදියන් මඟින් ආරණ්‍ය.lk සාමාජිකයින් සම්බන්ද කර ගන්න.

වෙබ් අඩවියට - මෙතනින් පිවිසෙන්න 
මුහුණු පොත් සමූහය - මෙතනින් පිවිසෙන්න 
දුරකතන අංකය - 070 2 79 79 59
ඊ මේල් ලිපිනය - info@aranya.lk

 රොකෝ මහතා ඇය සොයා ගිය ගමන

පසු සටහන

•  අධ්‍යාපනික පහසුකම් අතින් ඉහලයැයි සම්මත ප්‍රදේශයන්හී ඇති පහසුකම් වලින් එක් දශමයකදු නොමැතිව ඕෂදී දියණිය අධ්‍යාපන කටයුතු සහ ජීවත්වීම දරනා වූ උත්සහය දැක රොකෝ මහතාට පමණක් නොව එදින ගමනට එක්වූ සාමාජිකයන්ගේ නෙතඟට කඳුලක් එක් කිරීමට සමත්වූවා යැයි පැවසීම අතිශෝක්තියක් නොවේය. ඒ තරමටම එහි පවතින්නේ දූෂ්කර කටුක තත්වයකි.

 

 අදත් වෙනදා මෙන්ම පහුරු ගෑ මම සුදු පූසා වම්හ..........

සිව්මංසල

අඳින් මාස හතලිස් අටකට පෙර අදවන් දිනක සුදුපූසා ලෙසින් බිළාල ස්වරූපයට පත්ව සයිබර් අවකාශයට සපැමිණ මම විවිධ මාතෘකාවන්ගෙන් යුතු කතා පියවරයන් පනස්තුනක්ද හිට් හැටපන්දහසකට මදක් වැඩි අගයක් සහිතව මගේ බ්ලොග් අඩවියේ හතරවන සැතපුම් කණුව අද දිනයේ පසුකර යන්නෙමි.

අද මේ සිව්වන වසර ගෙවෙන මේ වෙලාවේ මට බ්ලොග් ලියන්නට පෙලබවු හා උදව් කල කිහිපදෙනෙකුව මතක් කිරීම මගේ යුතුකමක් කියලා හිතනවා

• මගේ බ්ලොග් එකේ හා හාපුරා කියලා පලකරපු පෝස්ටුව වෙච්චි දඩයමේ යාම  කතාවට ඉස්සෙල්ලාම නමෝවිත්තියෙන් පලවෙනි කමෙන්ටුව කොටන්නට යෙදුනාවූ  අවන්හලේ මහේශ් රත්නායක

• කැන්ගරුලන්තයේ බටහිරට ආසන්න පර්ත් නගරබද පදිංචිව සිටියාවූද සිරි ලංකා ගමනාගමන මණ්ඩලයේ කුරුණෑගල දකුණ සහ ගම්පහ ප්‍රාදේශීය වැඩපලවල් වල මාගේ පියා සමග සේවය කලාවූද හදිසියේ අප අතරින් සමුගත් ඔබ්සවර් නැත්තම් ඔබා මාමා ලෙසින් බ්ලොග් ලොව දැන හදුනාගත් සනත් විජේවර්ධනයන් 
• මගේ පාසලේ මා හා සමාන්තර ශ්‍රේණිවල ඉගෙනුම ලැබුවා වූත් මෑතකදී නාස් ලණුව දමා බැද ඇති තහනම් අඩවියේ අඩවි රජු.
• පන්සලේ කතා වගේම බස් පලුවන්ගේ කතා වගේම විශාල කතා ප්‍ර‍මාණයක් බ්ලොග් අවකාශයට දායාද කලා වූවද අද වන විට බ්ලොග් ලිවීම යනු කුමක්දැයි නොදන්නා තත්වයට පත්වී ඇති මාරයාගේ හෝරාවේ මාරයා 
• බ්ලොග් ලෝකෙට මුල් ගුරු වෙච්චි, තමන් දැල්වු   පහණින්  තවත්පහන් සිය ගණනක් දැල්වූ, පුක යනු කුණුහරුපයක් නොවන බව ඔප්පු කලාවූත් රසික සූරියාරච්චි නොහොත් පැරණි කතන්දරකාරයා  
• ෂර්වුඩයෙ රොබින් වගේ කෙහෙල්කොටුවට පැනල කෙසෙල් ගස් පෙති පෙති කපාපු, හුරතලේට ඌරු පැටියෙක් හදාපු, කෙහෙල් කොටුවේ චූටි මහත්තයා නොහොත් බුද්ධී ප්‍රසාද් 

• පූසාව සජීවීව හමුවී ඇති මගේම පාසලේ බ්ලොග්කරු සිරාගේ කාමරේ සිරා කොලුවා 

 
එදා පළමු අවුරුද්ද පසුකරපු මොහොතේ මම ඔබට කිව්වා මම කොහොමද බ්ලොග් ලිවීමට පෙළඹුනේ කියලා. මුලදි කරගන්න බැරිවෙයි කියලා හිතුනත් දැන්නම් අබිං කෑවාවගේ තමයි. මොනවාහරි නොලියා ඉන්නම බෑ වගේම බ්ලොග් කියවන්නේ නැතුව ඉන්නත් බෑ කොච්චර වැඩ රාජකාරී ගොඩගැහිලා තිබ්බත්. බ්ලොග් ලියන කෙනෙකුගෙන් ඇහුවොත් ඇයි ලියන්නේ කියලා, නොයෙකුත් පිළිතුරු ලැබෙන්නට පුළුවන්. අපි කාටවත් මේ සමාජයේ තනිවී ඉන්නට බැහැ. අපගේ සිතුවිලි හා චිත්තාවේගයන් සදහන් නොකර ඉන්නට බැහැ. සමහර විටකදී සිතෙහි පවතින ආවේගයන් හා කෝපයන් පිටකරන්නත් මගේ අතින් ලිපි ලියවෙච්ච අවස්ථාවන් නැතුවාම නෙවෙයි නිර්සත්වයෝ කතාමාලාව ඒකට හොඳම උදාහරණයක්, අපාය අමතක කලොත් ඉතිරි සෙසු චරිත සියල්ලක්ම අදටත් සූජීවත්ව සිටින අය. අනෙකුත් සෑම ලේඛන සහ ප්‍රකාශන මාධ්‍යවල යෙදෙන්නන් කරන්නේත් එයමයි. ඉතින් බ්ලොග් ලියන අපිත්, අනෙකුත් මුද්‍රිත සහ විද්‍යුත් මාධ්‍ය වලට වඩා පෞද්ගලිකත්වය විදහා දක්වමින්, ආවේගයන් පිටකරමින් ලියන එකයි කරන්නේ කියලයි මම නම් හිතන්නේ.  

 

බ්ලොග් අඩවිය ඇරඹුදිනයේ සිටම මාසයකට ඒක පෝස්ටුවක් වත් පල කලද ආරම්බක සමයේ ලියන්නට තිබුන ආශාව නැතිවෙලා ගියාද කියලක් වෙලාවකට හිතෙන තරමටම දැන් කම්මැලි වෙලා. දෙදහස් දහඅට අවුරුද්දටම මගේ අතින් ලියවුනේ ලිපි දෙකක් විතරයි. ලියන්න දේවල් ගොඩක් හිතේ තිබුනත් ඒවා අකුරු කරන්න පූසා කම්මැලියි. කොහොම උනත් ආයෙත් පරණ විදිහටම ලියන්න උත්සහා කරනවා. කෙසේ වුනත් අතීතයේ ආසාවෙන් කියවපු බ්ලොග් අඩවි අදවන කොට යාවත්කාලීන නොවීමත් ඒවා රචනාකල සොඳුරු නිර්මාණකරුවන්ට බ්ලොග් යනු කුමක්දැයි අමතකවී තිබීමත් කණගාටුවට කරුණක්.

ගෙවුන වසරේ ලංකාව තුල පිහිටා තිබෙන්නාවූ සියලූම පන්සල් ආරමයන් පිළිබඳ විස්තර හා ස්වාමීන්වහන්සේලාගේ අවශ්‍යතාවයන් සොයා බලා ගිහි පින්වතුන් වෙත ඉතාමත් විධිමත් හා විශ්වසනීය ක්‍රමවේදයක් හරහා සම්බන්ධීකරණය කරමින් ඒවායේ අවශ්‍යතා සපුරාලීම සඳහා අවශ්‍ය මාර්ගෝපදේශනය සැලසීම ප්‍රමුඛතම අරමුණ කරගනිමින් ආරම්භ කරන ලද ආරණ්‍ය.lk සංවිධානය හා එක්ව කටයුතු කරන්නට ලැබීම අලුත් අත්දැකීමක් මෙන්ම මානසික සුවයක් ලබාගැනීමටත් ඉවහල් වුනා. එහි සියලුම සාමාජික සාමාජිකාවන් තරුණ වයසේ පසුවන්නන්. මෙම සටහන කියවන ඔබලාගේ ප්‍රදේශයේ දුෂ්කර විහාරස්ථාන වල අඩුපාඩු තියෙනවා නම් හෝ එවැනි අවශ්‍යතාවයන් පවතින ස්ථාන ගැන දන්නවා නම් ආරණ්‍ය.lk වෙත දන්වන්න. ඒ සදහා වේබ් අඩවිය වෙත පිවිසීමෙන් හෝ මුහුණුපොත හරහා වැඩිදුර තොරතුරු ලබා ගන්නත් මේ වනතුරු සිදුකර ඇති ප්‍රණ්‍යකර්ම වල විස්තර දැකබලා ගන්නත් ඔබට පුලුවන්.

ඉහත සදහන් කල පිරිසට අමතරව සුදුපූසාගේ අඩවිය අරබා ගෙවුනු වසර හතර පුරාවට නිතරම ගොඩවදින අම්බලන්ගොඩයා ,කුරුට්ටන් පිරිස , දිනේෂ් , කැලේ පිපුණු මල් , වැසි දැරිය , අටම්පහුර අටම්තුමා, බ්‍රා මෙන්ඩිස් සහ ප‍්‍ර‍සන්න වැනි අය මෙන්ම වරක් හෝ පැමිණි කොමෙන්ටු යෙදූ නම් වශයෙන් සදහන් නොකල එකී මෙකී නොකී සෑම සියලුම දෙනාටම හිස නමා ආචාර කරමි.....

ඒ වඟත් මෙසේම අදත් පහුරු ගෑ මම සුුදුපූසා වම්හ.......................

අපි නොදන්න චෙක්පත් - තුන්වන කොටස

පලමු කොටස
දෙවන කොටස

කලින් කොටස් වලින් චෙක්පතක ප්‍රධානම කොටස් ආකෘතිය වගේම චෙක්පත් ලිවීමේදී භාවිතා කරන රේඛණයන් ගැන පැහැදිලි කරපු හින්දා අද චෙක්පත් අඟරු වීම් පිලිබදව ලියන්නයි හිතුවේ. ජීවිතේ කවදහරි දවසක ඔයාලටත් මොකක්හරි දේකට චෙක්පතක් ලැබිලා ඇතිනේද? එහෙමත් නැත්නම් ඔබ චෙක්පත් මගින් ගෙවීමක් සිදුකරලා තියෙනවා වෙන්නත් පුලුවන්. ඔයාගේ නමට ලැබුණ චෙක්පත බැංකුවට  ගෙනිහින් මුදල් බවට පත්කරගෙන හෝ ගිණුමට තැන්පත්කරලා මුදල් අරගෙනත් ඇති කලාතුරකින් ඒ වගේම ඔබට ලැබුණු හෝ ඔබ නිකුත් කල චෙක්පතක් අඟරු වෙලත් ඇති. ඒ අඟරු චෙක්පත වෙනුවෙන් අඟරු චෙක්පත් නිවේදනයක්(CRN - Cheque Return Notices) ඔබ අතට පත්වෙලත් ඇති
නමුත් ඒ පිටිපස්සේ තියෙන විශාල ක්‍රියාවලිය ගැන ඔයාල ටිකක් හරි දැනගෙන සිටියාද?

අද කාලේ වගේ පරිඝණකගත කරපු පද්ධති නැති ඒ අතීතයේදී දිවයින පුරා ශාඛාවල දිනපතා එක්රැස් වන චෙක්පත් කුරියර් සේවා මඟින් ඒ ඒ බැංකුවේ ප්‍රධාන කාර්යාල වෙත ගෙන්වා ගෙනයි නිෂ්කාශණ කටයුතු සිදුකරනු ලැබුවේ. උතුරු නැගෙනහිර යුධ තත්වය පැවති කාලසීමාවලදී ඒ ඒ ශාඛාවල චෙක්පත් දින නියමයකින් තොරව ප්‍රමාද වුනා සජීවී ලෙසම ඒවා ප්‍රධාන කාර්යාලය වෙත ලැබිය යුතුව තිබූ නිසා. නමුත් අද වන විට ලංකාවේ සියලුම වාණිජ බැංකු ජාලගත කර චෙක්පත් නිෂ්කාශණ කටයුතු සදහාම සීමාසහිත ලංකා ක්ලියර් (Lanka Clear) සමාගම ලෙසින් වෙනමම ආයතනයක් ලංකා බැංකු මූලස්ථානයේ 18  වන මහලේ පිහිටා තිබෙනවා.

අද වන විට චෙක්පත් නිෂ්කාශණ ක්‍රියාවලිය කෙටියෙන් පවසනවානම් අද වන විට අතීතයේදී මෙන් එකතුවන චෙක්පත් භෞතික වශයෙන් ඒ ඒ බැංකුවල මූලස්ථානයන් වෙත යැවීමක් සිදු කරන්නේ නැහැ. ඒ වෙනුවට සෑම චෙක්පතක්ම දෙපැත්තෙහිම ස්කෑන් කරන ලද ප්‍රථිම්භයන්(scan copy) මාර්ග ගත ක්‍රමයට අන්තර්ජාලය හරහා සීමාසහිත ලංකා ක්ලියර් (Lanka Clear) සමාගම වෙත යොමු කරනු ලබනවා. සියලුම ආයතන වලින් චෙක්පත් ප්‍රථිම්භයන් ලද පසු ඔහුන් විසින් ගැටලුවකින් තොරව ගෙවා අවසන් කල හැකි චෙක්පත් ගෙවා අවසන් කර ගැටලු සහගත චෙක්පත් (ගිණුමේ මුදල් නොමැතිවීම, ආදර්ශ අත්සන් වෙනස් වීම, නව ගිණුම් වලට අදාල අත්සන් පද්ධතියේ නොමැතිවීම ආදී) පසුදින දිනයේ වැඩ කටයුතු ඇරබීමට පෙර ඒ ඒ ශාඛාවලට යවනු ලබනවා. එවිට ඒම ශාඛාවන්හි කළමණාකරුවන් ඒ සම්බන්දයෙන් ගන්නා තිරණ දන්වා යැවු පසු එදිනම දහවල් 2.30 ට අඟරු කරන ලද චෙක්පත් පිලිබදව ඒ ඒ ශාඛාවන්ට දන්වන අතර අඟරු නොවූ චෙක්පත් තැන්පත්කරුවන්ට තම මුදල් එතැන් සිට ලබාගැනීමට හැකියාව ලැබෙනවා.

 අඟරු චෙක්පත් නිවේදනයේ ආකෘතිය

අඟරු වූ චෙක්පත් සදහා එසේ අඟරු වීමට හේතුව සහ චෙක්පත් විස්තරය ඇතුලත් සවිස්ථරාත්මක ප්‍රකාශයක් අඟරු චෙක්පත් නිවේදනය (CRN - Cheque Return Notices) ලෙස තැන්පත්කරු වෙත ලංකා ක්ලියර් ආයතනයෙන් පසුදින ලැබෙන්නට සලස්වනවා.

ප්‍රධාන වශයෙන් මෙහි කොටස් තුනයි

A කොටස

මෙම කොටස තුල ඔබ විසින් තැන්පත් කරන ලද චෙක්පතෙහි අංකය වටිනාකම ගෙවීමට සම්බන්ද බැංකුව හා ශාඛා අංකය සහ අඟරුවීමට හේතුවූ කාණ්ඩයට අදාල සංකේත අංකය යනාදී තොරතුරු ඇතුලත් වෙනවා.

B කොටස

අඟරුවීමට ලක්වූ චෙක්පතෙහි නිෂ්කාශණය පිලිබදව තොරතුරු හා යලි ඉදිරිපත් කල හැකිද නොහැකිද යන්න සදහා උපදෙස් මෙම කොටසෙහි අඩංගු වේ.

C කොටස

අඟරු කරන ලද චෙක්පතෙහි ඉදිරිපස හා පසුපස ප්‍රතිබිම්භයන් මෙම කොටසේ ඇතුලත් වේ.

චෙක්පතක් අඟරු කිරීමට හේතු බොහෝමයක් පවතින අතර ඒවා ප්‍රධාන වශයෙන් යලි ඉදිරිපත් කල හැකි (Re presentable) සහ යලි ඉදිරිපත් කල නොහැකි (Non re presentable) ලෙස වර්ග කර හේතුවට ආවේනික සංඛේත ක්‍රමයක් මඟින් පෙල ගස්වා තිබෙනවා. පහත දක්වා ඇත්තේ එසේ අඟරු සංඛේතය හා එසේ වීමට හේතුන්ය.


යලි ඉදිරිපත් කල හැකි (Re presentable) අවස්ථාවන්හීදී  අඟරු වීමට අදාල වන හේතු

• අයපත් උපලබිධි වී නැත - 02-  (Effects nor realized)
  
  චෙක්පත නිකුත්කල තැනැත්තාට ලැබිය යුතු චෙක්පත් ඔහුගේ ගිණුමේ තැන්පත්ව තිබුණද ඒවා තවමත් නිෂ්කාෂණය නොවී තිබීම හේතුවෙන් ගෙවීමට ඉදිරිපත් කල චෙක්පතට සරිලන මුදලක් ගිණුමේ නොමැති වීම නිසා මෙම හේතුව මත චෙක්පත අඟරු කරණු ලැබේ. පසු දිනය යලිත් ඉදිරිපත් කර මුදල් කර ගැනීමට ආදායකයාට හැකියාව ඇත.
• ආදායකයාගේ පිටසන අවශ්‍යයි - 10 - (Payee's endorsement required)
  
  පිටසන් කල යුතු අවස්ථාවකදී පිටසන රහිතව තැන්පත් කර ඇති නිසා අඟරු වීමට ලක්වී ඇත. මෙහිදී අගරු චෙක්පත් නිවේදනයෙහි C කොටසේ ඇති චෙක්පත් ප්‍රථිම්බය මත නිවරදිව පිටසන් කර එම කොටස යලිත් තැන්පත් කල හැකිය.
  
• ආදායකයාගේ පිටසන අවිධිමත්ය - 11 -  (Payee's endorsement irregular)
  මෙහිදීද ඉහත සදහන් පරිදිම අගරු චෙක්පත් නිවේදනයෙහි C කොටසේ ඇති චෙක්පත් ප්‍රථිම්බය මත යලි පැහැදිලිව පිටසන් කර එම කොටස යලිත් තැන්පත් කල හැකිය
  
  
• ආදායකයාගේ පිටසන අපැහැදිලිය - 12 -  (Payee's endorsement illegible)
  මෙහිදීද ඉහත සදහන් පරිදිම අගරු චෙක්පත් නිවේදනයෙහි C කොටසේ ඇති චෙක්පත් ප්‍රථිම්බය මත යලි පැහැදිලිව පිටසන් කර එම කොටස යලිත් තැන්පත් කල හැකිය
  
  
• මතු දාතම සහිත චෙක්පතකි - 13 -  (Post dated cheque)
  
  චෙක්පතෙහි මුහුණත සදහන් දිනය තැන්පත් කල දිනට පසුව යෙදෙන දිනයක් සදහන්ව තිබීම හේතුවෙන් අඟරු වීමට ලක්වෙයි. අදාල සදහන් වන දිනයේදී හෝ ඊට පසු දිනක යලිත් තැන්පත් කිරීමට හැකිය.
• අණකරුගේ තහවුරුව ලැබෙන තෙක් ගෙවීම කල් දමා ඇත - 14 -  (Payment postponed pending drawer's confirmation) චෙක්පතක් සම්බන්දයෙන් සැකයක් හෝ අණකරු විමසා තහවුරු කරගත යුතු අවස්ථාවකදී අදාල තහවුරු කිරීම සිදු කර ගන්නා තෙක් ගෙවීම් අත්හිටවූ බව මෙම අඟරු හේතුවෙන් කියවේ
  
• අරමුදල් මාර්ගස්ථයි - 16 -  (Funds in transition)
  
  මෙය රජයේ ගිණුම් මගින් නිකුත් කරන චෙක්පත් සදහා පමණක් අදාලවේ
 

පසු සටහන

• යලි ඉදිරිපත් කල නොහැකි (Non Re presentable) අවස්ථාවන්හීදී  අඟරු වීමට අදාල වන හේතු වගේම අගරු චෙක්පත් නිවේදනයේ වලංග්‍ර හා නීතිමයභාවය පිලිබද තොරතුරු මීලග කොටසින් බලාපොරොත්තු වන්න.

ඒ වගත් මෙසේම අදත් පහුරු ගෑ මම සුදුපූසා වම්හ......

බැංකුවේ ජීවිතේ හතරවන කොටස - ණය අයකරගැනීම සහ ව්‍යාජ දිනුම

පලමුවන කොටස
දෙවන කොටස
තුන්වන කොටස

මේ අද සදහන් කරන සිදුවීම සිදුවන කාලට වන විට මම ජාතියේ මහා පහන්ටැබේ කොළඹ නවයට ආසන්න ශාඛාවකට වී දැහැමෙන් සෙමින් පුහුණු කාලය ගත කරමින් සිටි සමයයි. විවිධ විවිධ අංශයන් තුල පුරුදු පුහුණුවී අවසානයට පැමිණියේ එපාම කරපු අංශයක් වන ණය අංශයටයි. එය ණය ලබාදීම්(Credits) සහ ණය අයකර ගැනීම්(Recovery) ලෙස ප්‍රධාන කොටස් දෙකකට බෙදා වෙන්කර තිබුණේ පරිපාලනයේ පහසුව තකාය.

ණය අංශයේ කටයුතු කිරීම එපා වන්නේ සමහරක් ගනුදෙණුකරුවන් ණය මුදල අනුමතකර ලබාගන්නා තුරු දත් තිස්දෙක විලිස්සා පෙන්වමින්ද සිනාසී කෙකරගා වැඳ වැටෙමින් දිනපතා වාතයක් වන තරමටම බැංකුව වෙත පැමිණියත් ණය මුදල ලබාගත් පසුව එය ගෙවන්නේද නැතිව හිටිහැටියේ උන්හිටි තැන්වලින් අතුරුදහන් වන නිසාය. ණය වාරික හිඟවූ විට ඒවා අයකර ගැනීමට අපිට ගනුදෙනුකරුවන් පසුපස හොරා පොලිස් සෙල්ලම් කරමින් මැරතන් දුවන්න සිදුවෙනවාය. සමහරුන් හදිසියේම අසනීපවී අසාධ්‍ය තත්වයේ පසුවෙති. තවත් සමහරෙක් අප නිවසට යන විටත් සිටිනවා දුටුවත් අපි නිවෙස වෙත යනවිට ණයකරු නිවසේ නැතිව දුර කතරක නෑදෑ ගමනක් හෝ අවමඟුලකට ගොසින්ය. එසේත් නැත්නම් අපි එනවා දුටු විගස ගෙදර දොර ජනෙල් සියල්ල වසා ගෙන කිසිවකු නිවසේ නොමැති බව හඟවමින් අතිවිශිෂ්ඨ ලෙස රඟපාති.

එකල අප ශාඛාවේ කළමණාකරුට අමතරව සිටි ලයිසන් චන්ඩියා වුණේ සහාය කලමනාකරු හිරන්ත අයියායි. කලින් කතාවල මා පවසා තිබෙන පරිදි උදෑසනට සුපිපුන මලක් මෙන් සිටියද දහවල් කාලයවන විට මල පරවී හිරන්තගේ ඉහ මුදුනට ඊරියකා වඩිනා බැවින් ඉතාමත් භයානක තත්වයට පත්වේ. එවිට කිසිවෙකුවත් හිරන්තගේ ලගින්වත් නොයන්නේ තම ආරක්ෂාව පිණිසය. ඔය අතරතුර ණය අයකර ගැණීමේ අංශය හිරන්තට සහ මා වෙත පවරමින් පත්මසිරි මහතා දුන් අභියෝගය වූයේ වර්ෂාවසානයට පෙර දෙමසක් තුල හිඟහිටි ණය මුදල් යලි අයකර ගැනීමේ කාර්යයයි.

මාසයක් ගතවන විට ලයිස්තුව සෑහෙන දුරට අවසන් කලත් වසර කිහිපයක් තිස්සේ විශාල ණය මුදලකට පොලු තබන ලද මෝරෙක් පිලිබදව  අපගේ අවධානය යොමු වූයේ මඟතොටේදීවත් ඇස නොගැටෙන ආකාරයට කලකසිට අතුරුදහන්ව සිටි නිසාය. මීට පෙර සිටි මාණ්ඩලික නිලධාරීන් ගෙදරට හොයාගෙන ගිය විටත් නිවැසියන් ලබාදී ඇති පිලිතුරවී තිබුනේ ණයකරු පිලිබදව තමන් කිසිවක් නොදන්නා බවයි.

එක් සෙනසුරාදා දිනයක සාමාන්‍ය ඇදුමින් සැරසුනු හිරන්ත සහ මම ලිපිගොණුවේ සදහන්ව තිබූ ලිපිනයට ණයකරු සොයා ගියෙමු. නිවසට ආසන්නවත්ම අප දුටුවේ කාන්තාවන් පිරිසක් ගම්මිරිස් සාදික්කා ආදී විවිධ වර්ගයේ කුළුබඩු වත්ත පුරාම ගෝණිවල අතුරා වියලමින් සිටින අයුරුය. කියන තරම් අඟහිඟයක් මෙම නිවෙස්හිමියන්ට නොමැතිබව අපි වටහාගත් අතර නිවසෙහි නැතැයි පැවසූ ණයකරු වූ නාගසේන මහතාද කොට කළිසමකින් සැරසී මිරිස් ගොඩක් සමඟ ඔට්ටු වන අයුරුද මනාව දැක බලා ගත්තෙමු. නාගසේනගේ නිවස අසලම පිහිටි වෙළඳසැලට ගිය හිරන්ත තමන් සතුවූ මිනිසුන් කතාකරවීමේ හැකියාව උපයෝගී කරගෙන නාගසේනගේ තත්වය විමසා සිටි අතර කඩයේ හිමිකරු තහවුරු කලේද නාගසේන මහතාට කිසිදු අහේනියක් නොමැති බවයි.

රැස්කරගත් තොරතුරු අප කළමණාකාර තැන්පත් පත්මසිරි මහතා හටද දන්වා ඔහුගෙන් ලද උපදෙස් පරිදි නාගසේන මහතාගෙන් ණය අයකරගැනීම සඳහා ඔහුටත් දිරවාගත නොහැකි ලණුවක් අඹරූ අපි ඒ ලණුව ගිල්ලවීම සදහා කෙලින්ම ගියේ නාගසේනගේ නිවසටයි. මල්ලී උඹ එක වචනයක්වත් කියන්න එපා යැයි මටත් කලින්ම තර්ජනය කල හිරන්ත කෙලින්ම ගොස් නාගසේන මහතා ඇමතීය

"මිස්ටර් නාගසේන මම බැංකුවෙන් ආවේ අපේ කස්ටමර්ලා අතර පවත්වන මේගා වාසනා දිනුම් ඇදීමෙන් ඔබතුමාට දිණුමක් ඇදිලා තියෙනවා අපි ඒක දැනුම් දෙන්නයි ආවේ. ඒත් පොඩි ප්‍රශ්ණයක් තියෙනවා තෑග්ග ලබා ගැනීම පිලිබදව කරුණාකරලා අදම බැංකුවට ඇවිල්ලා මැනේජර්ව මුණගැහෙනවද?"

"මොකක්ද මහත්තයෝ තෑග්ග? හරි මම දැන් එන්නම්"
යැයි පැවසූ නාගසේන තම බිරින්දෑ සමග කතා කරන ඇසිල්ලෙන් අපි යලිත් බැංකුව වෙත පැමිණියේ පත්මසිරි මහතාගේ උපදෙස් පරිදිය. තවත් විනාඩි දහයක් ගෙවුන තැන වසර ගණනක් අතුරුදහන්වී සිටි නාගසේන මහතා සුභ නැකතින් බැංකුව වෙත සම්ප්‍රාප්ත වූයේ තමා ගිල්ලේ ඒසේ මෙසේ ලණුවක් බව නොදැනය. පත්මසිරි මහතා සහ නාගසේන අතර ඇතිවූයේ පහත පරිදි සංවාදයක්ය

"මැනේජර් මහත්තයා මට දිනුමක් ඇදිලා තියෙනවා කිවුවා ඒක දැනගන්න කියලා ආවේ"

"මිස්ටර් නාගසේන එන්න එන්න වාඩිවෙන්න. තෑග්ගක් නම් ලැබිලා තියෙනවා ඒකයි මම අපේ ඔෆිසර් කෙනෙකුට කිව්වේ ගෙදරටම ගිහින් කියන්න කියලා. හැබැයි පොඩි ප්‍රශ්ණයක් තියෙනවා"

"මොකක්ද මැනේජර් මහත්තයා?"

"මේකයි මිස්ටර් නාගසේන ඔයා ලෝන් එකක් අරන් තියෙනවා ඒක ගෙවලා නෑ.  ඒක සෙට්ල් කලොත් තමයි මේ තෑග්ග ඔබතුමාට ලබාගන්න පුලුවන් මොකද කරන්නේ?"

 

 මදක් කල්පනා කරමින් සිටි නාගසේන මහතා පසුදින පැමිණ තමාගේ හිඟහිටි ණය මුදලත් පොලියත් ගෙවා දැමුවේ අප කවුරුත් නොසිතූ ලෙසින්ය. ණයත් ගෙවා කළමණාකාර තැන්පත් පත්මසිරි මහතා අතින් තම ත්‍යාගයත් ලබා නාගසේන මහතා නික්ම ගියේ අපේ හිසේ තිබූ විශාල බරක් පසෙක හෙලමින්ය.

පසුවදන

• නාගසේන මහතා ත්‍යාගයක් නිසා ණය මුදල ගෙවා දැමුවද එවැනි තරඟයක් කිසිදා පැවැත්වූයේද නැත. තරඟය නිර්මාණය කලේ ජයකොඩි මහතාත් මමත් හිරන්තත් හවුලේය. නාගසේන මහතා රැගෙන ගියේ මල්වත්ත පාරේ රූපසිංහ ස්ටෝර්ස් වෙතින් මිලට ගත් අඩු වටිනාකමකින් යුතු රයිස් කුකරයක් බව අදටත් ඔහු නොදන්නා බව ඉරහද සේ විශ්වාසය.
• කතාවේ කතානායකයන් වූ පත්මසිරි මහතා අද විදෙස් ගතව පසුවෙන අතර හිරන්ත සොයුරා අද ආයතනික ශාඛාවේ ණය නිළධාරී ලෙස කටයුතු කරයි.

•  හදිසියේම මෙම කතාව සිහිවූයේ පසුගිය සතියේ දිනක පිටකොටුවේදී මා හට නාගසේන මහතා මුණගැසුණු නිසාය.

 
 ඒ වඟත් මෙසේම මතකය පහරා පහුරු ගෑ මම සුදුපූසා වම්හ........

ලේ දන්දීමේ පිංකම පස්වන පියවරට මත්තෙන්

"මා වැනි බිළීන්දා

මරුවා යයිද කැන්දා

අනේ ඒ හින්දා

දෙන්න ලේ බිඳු මාමා නැන්දා "

නිතර දෙවෙලේ කොහේහරි තාප්පෙක ඇලවිලා තියෙන මේ කවියට අදාල පොස්ටරේ ඔයාල කවදහරි දවසක දැකලා තියෙන බවට කිසිදු සැකයක් නැහැ. ඔබ ජීවිතයේ කෙදිනකහෝ රුධිරය පරිත්‍යාග කරලා තියෙනවද? ඔබ පරිත්‍යාග කරණු ලබන සෑම ලේ පයින්ට් එකක් භාවිතයෙන් ජීවිත තුනක් බේරාගන්න පුලුවන්. අවුරුදු 18 ට වැඩි 60 ට අඩු නිරෝගී ඕනෑම කෙනෙකුට හිමෝග්ලොබින් ප්‍ර‍තිශතය ඒකක 12 ට වැඩි නම් සෑම මාස හතරකටම වරක් ලේ පරිත්‍යාග කරන්න පුලුවන්. ප්‍රධාන රුධිර ගණ හතරක් වන අතර (A, B, AB, O) ඒවා තවදුරටත් positive හෝ negative ලෙස Rh සාධකය (Rh factor) අනූව බෙදේ. රතු රුධිරාණු සඳහා AB යනු සර්වප්‍රතිග්‍රාහකයෙකු වන අතර O negative යනු සර්වදායකයෙකු ලෙස සැලකේ. 

පළමුව මෙසේ රුධිර වර්ග හතරක් ඇති බව හඳුනා ගන්නා ලද්දේ 1901 වසරේදී වෛද්‍ය කාර්ල් ලෑන්ඩ්ස්ටයිනර් විසිනි. මීට අමතරව 1952 දී ඉන්දීය ජාතික වෛද්‍ය Y.M බෙහෙන්දේ විසින් බොම්බායේදී රිය අනතුරකට පත් තරුණයන් දෙදෙනෙකුගේ රුධිර පරික්ෂාවකින් පසු සොයාගත් බොම්බේ O+ රුධිර ගණය ලොව ඇති දුර්ලභම රුධිර කාණ්ඩය ලෙසින් සැලකෙන අතර ලංකාවේ පවුල් පහක් පමණක් වාර්ථාවන බව සදහන් වේ.

රුධිර ගණ අනුව ගැලපීම්

රුධිර දායකයෙකු වීමට අවශ්‍ය මූලික සුදුසුකම්

• වයස අවුරුදු 18-60 ත් අතර ගැහැණු පිරිමි දෙපාර්ශවයටම (පලමු වරට ලබාදෙන්නේ නම් උපරිම වයස 55 ක් ලෙස සලකනු ලැබේ)
• බර කිලෝග්‍රෑම් 50 ට වඩා වැඩිවිය යුතුයි
• රුධිරයේ හිමොග්ලොබින් ප්‍ර‍මාණය ඩෙසිලීටරයකට ග්‍රෑම් 12 ට වඩා වැඩිවිය යුතුය.
• රුධිරය ලබා දෙන මොහොත වන විට පැය හයකට වඩා නින්දක් ලබා තිබිය යුතු වීම.

රුධිර ප්‍ර‍දානයට නුසුදුස්සෙකු වීමට හේතු

• පසුගිය වසරක කාලය තුල ඔබට රුධිරය හෝ රුධිර කොටස් ලබාදීමට සිදුවූවා නම්
• ඔබට විශ්වාසවන්ත එක් ලිංගික සහකරුවකුට වඩා සිටිනවා නම්
• කෙදිනක හෝ මත්ද්‍ර‍්‍ය එන්නත් ලබාගෙන තියෙනවා නම්
• පසුගිය මාස හයක් තුල කුමක් හෝ ශල්‍යකර්මයකට භාජනය වී ඇත්නම්
• පසුගිය මාස හයක් තුල විදේශගතව පැමිණියා නම්
• පසුගිය වසරක් තුල කන්විදීමක් හෝ පච්චා කෙටීමක් සිදුකර ඇත්නම්
• කෙදිනක හෝ සෙංගමාලය හෙවත් කහඋණ වැලදී ඇත්නම්

රුධිරය ලබාදීමෙන් පසුව

• රුධිරය ලබාදීමෙන් පසුව අවම විනාඩි 20 පමණ විවේකීව වෛද්‍යවරයාගේ හා කාර්යමණ්ඩලයේ අධීක්ෂණය යටතේ එම ස්ථානයේම රැදී සිටිය යුතුයි
• සුලු ආහාරයක් හා දියරමය පානයක් ලබාගත යුතුයි
• කුමක් හෝ අපහසුතාවයක් ඇත්නම් වෛද්‍යවරයාට හෝ කාර්ය මණ්ඩලයට දැන්විය යුතුයි
• රුධීරය ලබාගත් ස්ථානයේ ඇලවූ ප්ලාස්ටරය පැය දොලහක් ගතවෙන තුරු නොගැලවිය යුතුයි
• ඊලග ප්‍ර‍ධාන ආහාරය ලබාගන්නා තුරු මත්පැනෙන් වැලකිය යුතුයි

ඔබ පරිත්‍යාග කල රුධිරය රෝගියෙකුට ලබාදීමට පෙර විවිධ සංඝටක වලට වෙන් කරනු ලබයි. ඒ රතු රුධිරාණු, සුදු රුධිරාණු, රුධිර පට්ටිකා හා රුධිර ප්ලාස්මාව ලෙසයි. මෙම එක් එක් සංඝටක විශේෂිත උෂ්ණත්වල නියමිත කාලයක් ගබඩා කරනු ලබයි.
රතු රුධිර සෛල සෙල්සියස් අංශක 4 ක් වැනි උෂ්ණත්වයක දින 35-42 අතර කාලයක් ගබඩා කර තබාගත හැකිය. රුධිර ප්ලාස්මාව  සෙල්සියස් අංශක ඍණ 30 වඩා පහල උෂ්ණත්වයක වසරක පමණ කාලයක්ද සුදු රුධිරාණු සෙල්සියස් අංශක 22 උෂ්ණත්වයක් යටතේ එක් දිනක කාලයක් තබා ගත හැකිය. පරිත්‍යාග කල සෑම රුධිර ඒකකයක්ම ප්‍ර‍ධාන වශයෙන් රෝග පහක් සදහා පරීක්ෂා කරනු ලබයි.

ශ්‍රී ලංකාවේ රුධිර ගණ අනුව ව්‍යාප්තිය

පිළිකා සඳහා ප්‍රතිකාර ලබන ළමයින්, අඩු වයසින් උපන් ළමයින්, හදවත් සැත්කම් වලට ලක්වන ළමයින්ට සහ ඩෙංගු රක්තපාත තත්වයට පත්වන්නන් හට රුධිරය මෙන්ම රුධිර පට්ටිකාද ඒ ඒ අදාල රුධිර වර්ගයෙන් අවශ්‍ය වේ.රක්ත හීනතාවයෙන් පෙළෙන රෝගීන්ට රුධිර සෛල ප්‍රමාණය වැඩි කිරීමට රුධිර පාරවිලයනය යොදා ගත හැක.තැලසීමියාව නම් ප්‍රවේණික රෝගය ලංකාවේ පුද්ගලයින් දෙදහසකට කට පමණ ඇති අතර ඔවුන්ට මාස්පතා රුධිර පාරවිලයනයන් සිදුකිරීම අවශ්‍ය වේ. ලංකා රුධිරපාරවිලන සේවයේ තොරතුරුවලට අනුව ලැබෙන පරිත්‍යාග වලින් 38% පමණ ප්‍ර‍මාණයක් O+ රුධිර කාණ්ඩයෙන්ද 34% පමණ ප්‍ර‍තිශතයක් A+ රුධිර කාණ්ඩයෙන්ද ලැබෙන අතර එම රුධිර කාණ්ඩයන් සුලබ වන අතර B- රුධිර කාණ්ඩයෙන් 2% ද AB- රුධිර කාණ්ඩයෙන් 1% වශයෙන් වාර්ථාවෙනුයේ ඉතා හිඟතාවයෙන් පෙලෙන රුධිර කාණ්ඩයන් ලෙසින්ය.

ලේ බැංකුවට ලැබෙන් පරිත්‍යාග වල ප්‍රතිශතයන් රුධිර ගණ අනුව

ලේ දන් දී නැති අයගෙන් 17% පවසන්නේ ඒ ගැන කිසිවිටකත් නොසිතූ බවත්, නොදැන සිටි බවත් ය. 15% ලේ දන් දීමට තමාට විවේකයක් නැති බව පවසයි.ලේ දන් දෙන අය ඊට පෙළබීමට ප්‍රධානතම හේතුව ලෙස දක්වන්නේ අනුන්ට උදව් කිරීමට ඇති කැමැත්තයි.ලේ දායක කිරීමට පමණක් ගත වන්නේ විනාඩි 15 කටත් අඩු වේලාවකි. ඔබ පැමිණි වේලාවේ සිට ලේ දී පිට වනතුරු පැයක් පමණ ගත වේ.ලේ පරිත්‍යාගයකින් පසුව පිටවූ දියර පැය කීපයක් ඇතුලත රුධිර සංසරණ පද්ධතියට එකතු වේ. රතු රුධිරාණු සති හතරක් ඇතුලත පෙර මට්ටමට පැමිණේ. පරිත්‍යාගයේදී වැය වූ යකඩ නැවත අවශෝෂණයට සති අටක් පමණ ගතවේ.ලේ පරිත්‍යාගයෙන් ඒඩ්ස් හෝ වෙනත් බෝවන රෝග වැළඳීමේ කිසිදු හැකියාවක් නැත. එසේ රෝග බෝ වෙනවා යැයි කීම මිත්‍යාමතයක්ම වන්නේය.

*******

කුෂාන් සහ ධනුෂ්ක

රුධිර පාරවිලනය සහ රුධිරය පිලිබදව මම මුලින් සදහන් කලේ අද කතාවට ප්‍රවේශ වීමට පහසුවක් ලෙසයි. ගම්පහ බණ්ඩාරණායක විද්‍යාලයේ ඉගෙනුම ලබමින් 2013 දී හදිසියේ අප අතරින් වෙන්වූ ධනුෂ්ක සමරකෝන් මිතුරා සහ 2016 වසරේදී අප අතරින් වෙන්වූ කුෂාන් දහනායක මිතුරාත් සිහිකරමින් ආරණ්‍ය.lk එකමුතුවේ සංවිධාන ශක්තියෙන් වසරක නිහැඩියාවකින් පසුව පස්වන වරටත් ලේ දනදීමේ කඳවුරක් එලබෙන ජනවාරි 05 දින පැවැත්වීමට සියලු කටයුතු සූදානම් කර ඇත.

දිනය     - 2019 ජනවාරි 05 සෙනසුරාදා දින
 
ස්ථානය - ගම්පහ සාම විහාරය (රත්නාවලී බාලිකා විදුහල අසල)

වේලාව  - පෙරවරු 08.30 සිට පස්වරු 03.30 දක්වා

මේ සටහන මම ලියන වෙලාව වෙනකොට අපි සංවිධානය කරන ලේ දන්දීමේ කදවුරට තියෙන්නේ තවත් පැය 72 ත් අඩු කාලයක්. අපි මේ වෙනකොට විවිධ ක්‍ර‍ම මගින් මේ පිලිබදව දැනුවත් කරලා තියෙනවා  පසුගිය වසර හතර පුරාවටම පැමිණි සියලුම රුධිර දායකයන් හට මෙවර කඳවුර පිලිබදව දන්වා ලිපි තැපැල් කර යවා තිබෙන අතරම ගම්පහ නගරයේ පොස්ටර් හා අත්පත්‍රිකා මඟින් දැනුවත් කර තිබෙනවා.

පෝස්ටර් සකසමින්

පෝස්ටර් සකසමින්

පසුගය දායකයින්ට සිහිකැඳවීම් ලිපි

ඔයාලට ලේ වලින් අඩුවක් නැහැ වැඩිපුරත් එක්ක තියෙනවා. ඒත් ලේ අඩු වෙලා ජීවිතයත් මරණයත් අතර සටන් කරන අය ඔබ අප අතරේ ගොඩක් ඉන්නවා. ඒ අයව ඒ සටනින් දිනවන්න ඔයාලටත් පුලුවන්. 
ඔබේ ලේ වලින් මේ අපේ රටේ කොතනක හරි මරණාසන්නව ඉන්න අම්ම තාත්තා කෙනෙක් ආච්චි සීයා කෙනෙක් සහෝදර සහෝදරියක් නැත්නම් අහිංසක පුංචි එකෙක් ජීවත් කරවන්න පුලුවන්නම් එයින් ඔබට දැනෙන සතුට සල්ලි වලට ගන්න බැහැ. ඒ සතුට ලබා ගන්න ඔබේ ලේ වලින් ජීවිතයක් ජීවත් කරවන්න පුලුවන්නම් එදාට එන්න
අමතක කරන්න එපා ඔයාලටත් කවදා හරි දවසක කාගේ හරි  ලේ  ජීවිතේ රැකගන්න ඕන වෙන්නත් බැරිකමක් නැහැ..

ඔබත් ඇවිත් යන්න එන්න තවත් ජීවිතයකට ආලෝකයක් වන්නට......

පසු සටහන

• රුධිර පාරවිලනය සම්බන්ද සංඛ්‍යාත්මක තොරතුරු ලබාදෙමින් කඳවුර පිලිබදව සමාජ මාධ්‍ය මගින් ප්‍රචාරනය ලබාදුන් නාරාහේන්පිට මධ්‍යම රුධිරපාරවිලයන සේවයට සහ දුර්ලභ බොම්බේ O+ රුධිර කාණ්ඩය පිලිබදව තොරතුරු ලබාදුන් කොළඹ වෛද්‍ය පීඨයේ නොලාන් සසේන්ද්‍ර සොයුරාට විශේෂ ස්තූතිය පිරිනැමිය යුත්තේය...
• ගම්පහ දිස්ත්‍රික් මහ රෝහලේ ලේ බැංකුවට අනුව දෙසැම්බර් සහ පෙබරවාරි අතර කාල සීමාව දැඩි ලේ හිඟයක් පවතින කාලසීමාවක් වන අතර යලිත් ඩෙංගු උණ ව්‍යාප්ත වීමත් සමග හිඟය උග්‍ර විය හැකිය.
• ඔබ එදිනට පැමිණෙනවා නම් ජාතික හැදුණුම්පත/රියදුරු බලපත්‍රය හෝ වෙනත් අනන්‍යතාවය සහතික කල හැකි ලියවිල්ලක් රැගෙන ඒමටත් අමතක කරන්න ඒපා.

අදත් වෙනදා මෙන් පහුරු ගෑ මම සුදුපූසා වෙමි..........